VOV4.Bahnar - Dôm dêh char Tây Nguyên hlôi yak hlŏh sơ năm Tân Sửu ƀĕnh tơ drong mơ mat tat yoa đơ̆ng jĭ Covid-19, jang đei lơ tơ drong hơ iă lơ̆m rim tơ drong hơ găt bơ̆ jang lơ̆m sơ năm. Hơ iă hăm dôm tơ drong jơ nei athei hŭt jơ hngâm jang tôch ai ‘mơ̆i gơ̆h đei, kơ chăng hăm dôm tơ drong nol tơ̆ hơ năp dơ̆ng, Tây Nguyên oei đei ƀĕnh tơ drong hơ mĕng păng đon pơ hnŏng lơ̆m 1 sơ năm ‘nao hơ met klăih lơ rơ ka jĭ so, tang găn tơ drong krê ‘nao vă jang tŏk pran kơ jăp.

Vă jê̆ Tết Nhâm Dần, tơ drong chă tơ mang lăng tơ̆ pơ lei tơm (plt) Đà Lạt, dêh char Lâm Đồng nhen tŏk ang hơ dăh đơ̆ng rŏng 1 kơ măng kơ jung tep hlơ̆k. 1840 tŏ hnam hotel đei bơ ngai tep ƀĕnh lơ̆m khei 1; lơ hnam homestay đei hơ met pơ rŏ tôch ‘lơ̆ng vă sơng tơ moi. Pơ gar pơ kao kơ plt păng dôm anih ngôi pơ chơt kơ tơ̆ng ơ̆r ăr nơ̆r pơ ma, ƀơ̆r hiĕk đơ̆ng lơ khul chă tơ mang lăng. Ƀok Phan Minh Trường, Kơ dră vei lăng pơ gar Ánh Sáng Đà Lạt, 1 lơ̆m dôm anih ngôi pơ chơt ‘nao, ‘lơ̆ng hơ iă ăn tơ băt: ƀok hơ len năng tôch kơ jăp jĭ Covid-19, ƀôh jĭ tơ̆ dôm plt tih đei tang găn ‘lơ̆ng.

Ƀok nhen băt anih chă tơ mang lăng vă jang tŏk hơ lơ̆k dơ̆ng. Păng vă chĕp vei tơ drong ‘lơ̆ng, pơm sư jing đei tơ pă, anih jang athei pơ jing trong tang găn jĭ mă kơ jăp: “Nhôn hơ met tôm tơ mam tang găn jĭ ăn bơ ngai jang, đơ̆ng che gom truh kơ mĭl pĕng găn đak hai tơ prăh, ƀao tay. Tơ moi truh hăm Pơ gar Ánh Sáng đei pơ tŏ hơ yuh hơ kâu, athei ôp ti hăm đak pơ gang pơ lôch pơ rang jĭ mưh mât lơ̆m pơ gar. Nhôn hơ met tôm rim tơ mam jô̆ hloi trong tang găn jĭ, ưh lăp roi tơ băt lơ̆m anih jang đĕch mă oei chih măt hăm Hnam pơ gang phường 8 păng Anih vei lăng jang pơ gang dêh char Lâm Đồng hai”.

Kŭm nhen Lâm Đồng, dêh char Dak Lak đei ƀôh lơ tơ drong nhen vă tŏk pran dơ̆ng đơ̆ng mŭk drăm, tơ pôl. Jĭ Covid-19 đei găn lê̆ lơ̆m hlŏh 2 khei hơ tuch sơ năm, kơ sô̆ bơ ngai ‘nao jĭ ưh đei lơ ƀiơ̆ kơ bơ ngai klăih jĭ; dôm tơ drong jang tih găh trong gre, dơ nâu đak tơ lĕch tơ lĕch jang, tơ ring tơ rang ‘nao đei pơ jing roi hrĕnh, pơm ăn lơ bơ ngai tơ mât jên jang roi lui, truh jang xa tơ̆ dêh char.

Yă Nguyễn Thị Thanh Thuỷ, 1 ‘nu bơ ngai tơ mât jên jang đơ̆ng plt Biên Hoà, dêh char Đồng Nai akhan, yak hlŏh jĭ Covid-19, Dak Lak păng 1,2 dêh char Tây Nguyên hlôi tơ ƀôh đei kơ jă kăp gĭt đơ̆ng kơ dih, jĭ dôm tơ ring kăl kơ arih, đei lơ tơ drong pran ‘lơ̆ng: “Lơ̆m 5 dêh char tơ ring Tây Nguyên ‘nŏh Dak Lak đei kơ sư̆k pơ jei pran, đei tŏ ‘mi kial, tĕh vă nhen Lâm Đồng. Hơ dai hăm ‘nŏh jĭ anih jang, trong nơ năm tơ̆ Dak Lak đei tĕh đak tôch tơ rĕk, đei trong gre kơ dâu hrĕnh, anih jang, trong, hnam pơ gang kơ jăp ‘lơ̆ng. Kơ jă tơ mam lăp dang 1 puăt mă ưh ‘nŏh 1/3 pơ têng hăm Lâm Đồng hrei ‘nâu păng tam mă đei ƀôh tơ drong ‘măn răk, ôn pơ vĕr vă hơ tŏk kơ jă”.

Sơ năm 2021, dôm dêh char Tây Nguyên tơ ƀâp lơ mơ mat tat tam mă biơh đei, mă lei kŭm jing sơ năm jang đang ‘lơ̆ng dôm tơ drong hơ găt jang mŭk drăm, tơ pôl. 1,2 tơ drong jang tŏk hlŏh tơ drong tơ sŭl tơ săl, pơ tơm jang tŏk ‘nao dơ̆ng. Nhen tơ̆ Dak Nông, tơ drong răm đơ̆ng tiu jur hlôi đei hơ met ming, tĕch mơ dro tiu tơ̆ tĕh đak đe đơ̆ng dêh char sơ năm 2021 tŏk 30 ‘măng pơ têng hăm sơ năm 2020; tơ̆ Dak Lak, Kon Tum păng Gia Lai, anih jang cao su huŏng tôch jrŭ lơ̆m lơ sơ năm ‘nâu kŭm vă tŏk dơ̆ng bơih, jên tĕch tơ̆ tĕh đak đei hlŏh 400 triu đô la. Mât lơ̆m sơ năm 2022, kŭm hăm tơ drong pran ‘lơ̆ng đơ̆ng ‘long kăp gĭt, Tây Nguyên kŭm jang đei lơ tơ drong jang găh unh hơ yuh rơ gŏh, kơ măy pơm tơ mam păng sơng đei kơ hrĕng tơ drong jang ‘nao dơ̆ng. Tơ drong dăr lăng tơ̆ dôm dêh char ăn ƀôh, anih tơ mât jên jang hiôk hian, pơm hla ar rơ đăh rơ đong ‘nŏh jĭ dôm tơ drong mă anih jang hơ pơi ‘mĕh hlŏh tơ̆ hơ năp kơnh. Păng ‘nâu kŭm jing nơ̆r pơ kăp tôch dêh đơ̆ng dôm tơ ring Tây Nguyên, vă jang đei dôm tơ drong jang tơm lơ̆m sơ năm 2022.

Ƀok Nguyễn Hữu Quế, Kơ dră Anih tơ lĕch nơ̆r sơ kơ̆t, tơ mât jên jang Gia Lai, ăn tơ băt: "Nhôn jang hơ doi hăm Anih vei lăng tơ mam drăm, cham char pơ tho ăn dôm bơ ngai tơ mât jên jang chă rơih dôm anih ‘lơ̆ng, pơm thoi yơ vă hrŭ jên tĕh tŏ sĕt ƀiơ̆ vă gơ̆h jang xa đei yoa lơ hlŏh. Vă jang đei tơ drong ‘nŏh nhôn tơ plih ming trong pơm hla ar tôch hiôk păng hơ len năng rim tơ drong hơ găt. Yă kiơ oei tơ hlăk, ưh pă lăp hăm luơ̆t ‘nŏh tơ lĕch nơ̆r pơ ma hăm anih jang kơ pal athei hŭt lê̆ vă pơ jing tơ drong ‘lơ̆ng, hiôk hian hlŏh ăn bơ ngai tơ mât jên jang."

Covid-19 pơ tơm vă găn đei, dôm tơ drong jang mŭk drăm ‘lơ̆ng hlôi jang tŏk dơ̆ng bơih, lơ tơ drong pran ‘nao đei tơ lĕch, dôm dêh char Tây Nguyên gơ̆h hơ mĕng kơ 1 sơ năm jang tŏk pran. Mă lei, dôm dêh char băt hơ dăh jĭ Covid-19 oei jing tơ drong krê tih, găn trong jang tŏk. Vă pơm ăn đon hơ mĕng jing đei tơ pă, athei đei đon jang tơ năp tôch ai đơ̆ng rim anih jang chinh trĭ păng tơ drong 1 jơ hngâm đơ̆ng kon pơ lei păng anih jang.

Kiơ̆ ƀok Nguyễn Đình Trung, ƀât mă roi đei lơ mơ mat tat, pơ long nol ‘nŏh đon jang tơ năp păng tơ drong vang bơ̆ jang đơ̆ng rim anih jang Đảng, khul kơ dră tơ ring roi tŏk hlŏh dơ̆ng; bơ ngai kăn ƀô̆, đảng viên athei jang tơ năp hơ drol. Dak Lak vă jang đĭ jơ hngâm, pơm ăn tơ drong hơ mĕng sơ năm 2022 jing đei tơ pă: “Roi mơ mat ‘nŏh athei roi adrin, hơ tŏk tơ drong tơ guăt 1 ƀơ̆r đon, khŏm bơ̆ jang dôm tơ drong hlôi tơ lĕch; pơ jing khul kăn ƀô̆ đảng viên rơ gei tơ găl hăm tơ drong jang. Sơ năm 2022 tơ dra adrol tơ drong jĭ oei hơ mơt đĕch. Yoa thoi nŏh, Khul kơ dră chĕp kơ̆l đảng dêh char pơ tho ăn rim anih jang chinh trĭ mưh bơ̆ jang athei jang ‘lơ̆ng tơ drong tang găn jĭ hai, pơ yoa ăn tơ drong jang atŏk tơ iung mŭk drăm tơ pôl tơ̆ tơ ring hai.”

Mât lơ̆m pơ yan Puih mak Nhâm Dần 2022, dôm dêh char Tây Nguyên hlôi tơ mât ƀĕnh jơ hngâm pran, kơ chăng hăm dôm tơ drong nol tơ̆ hơ năp. Sơ năm 2022 gô jing 1 sơ năm jang tŏk, 1 sơ năm hơ met pơ ‘lơ̆ng. ‘Nŏh ưh lăp đon hơ mĕng đĕch mă oei jing đon pơ hnŏng chinh trĭ păng tơ drong hơ met tôm tơ drong vă jang kĕh dôm tơ drong jang tih.

Dương Đình Tuấn: Chih

Dơ̆ng: Tơ blơ̆