Tơ̆ Hop akŏm, tang măt ăn Anih vei lăng tĕch mơdro dôm dêh char hơlen năng, pơma nuh găh tơdrong vei lăng anih tĕch mơdro lơ̆m sơnăm 2022 păng tơdra hơdrol tơdrong tĕch mơdro xa adrol, lơ̆m păng đơ̆ng rŏng kơ Têt Nguyên đán Qúy Mão 2023, mă loi jĭ dôm tơdrong ƀơm truh đak xăng, đak dâu, tơmam pơyoa ăn năr têt Nguyên đán, tơdrong hơlĕnh pơdăr, pơm glăi đơ̆ng tĕch mơdro hăm điên tư.

Pơma lơ̆m hop akŏm, ƀok Trần Hữu Linh, Kơdră chĕp kơ̆l Anih vei lăng tơdrong tĕch mơdro pơma hơdăh, sơnăm ‘nâu Tết Tây păng Nguyên đán jê̆ băl, tơdrong ‘mĕh vă răt yoa tơmam đơ̆ng kon pơlei kŭm tŏk lơ tơ̆ hơnăp kơnh. Yoa thoi nŏh, athei khul vei lăng tĕch mơdro dôm dêh char hơtŏk tơdrong dăr lăng, vei kơjăp anih tĕch mơdro, sek tơlang tơpăt dôm tơdrong pơm glăi luơ̆t găh tĕch mơdro, năng kăl tơdrong hơlen năng, sek tơlang dôm khul grŭp, anih jang, rim bơngai pơgâm ƀât tơdrong ‘mĕh răt tơmam tŏk lơ ƀât têt vă hơtŏk kơjă tơmam ưh kơlăp, pơm ưh sơđơ̆ng tơ̆ anih tĕch mơdro, mă loi hăm dôm tơmam đei răt yoa lơ ƀât Têt Tây păng Têt Nguyên đán sơnăm 2023.