VOV4.Bahnar - Atŭm lơ̆m tĕh đak, năr 5/9, rim dêh char Tây Nguyên rơ ông rơ ang pơgơ̆r pơm lêh mơ̆t hŏk sơnăm ‘nao, rim tơring hơdrin hơmet pơ ‘lơ̆ng dôm tơdrong tơnap tap, sơđơ̆ng tơmam drăm păng pơtho pơhrăm ‘lơ̆ng đơ̆ng blŭng sơnăm hŏk ‘nao hloi.

- 17.500 ‘nu hŏk tro apŭng Ea Sŭp dêh char Dak Lăk mơ̆t hŏk sơnăm hŏk ‘nao 2022 – 2023 lơ̆m jơ ‘năr chơt hơ iă ‘nă hal, ‘năr rơngơp lơ̆m năr pơm lêh mơ̆t hŏk. Ư̆h kơ nhen sơnăm hŏk hơdrol mư̆h jĭ hơbŭh Covid-19pơrăm, hŏk tro vang pơm lêh mơ̆t hŏk kiơ̆ online, sơnăm au, ƀok thây kô păng hŏk tro vang năm Pơm lêh mơ̆t hŏk sơnăm hŏk ‘nao tơ̆ rim hnam trương hăm jơyhngơ̆m đon chơt hơ iă. Vă hơmet ăn sơnăm hŏk ‘nao, apŭng Ea Sŭp hlôi tơmơ̆t hlŏh 5 ti 200 trĭu ming man hnam trương, răt tơmam drăm pơtho pơhrăm. Hlŏh 1.200 ‘nu ƀok thây kô vang năm hŏk pơhrăm ming atŏk ‘lơ̆ng bơ̆ jang pơtho pơhrăm vă sơđơ̆ng ăn, pơtho pơhrăm hơgei.

– Lơ̆m tơring kơ dêh char Đăk Lăk, rim hnam trưng pơm Lêh pơtơm xơnăm hŏk 'nao 2022 -2023. Xơnăm hŏk âu, jâ̆p dêh char đei hloh 450.000 'nu hŏk tro tơ̆ dôm jăl hŏk, lơ̆m noh hŏk tro kon kông đei hloh 56%. Kiơ̆ kơ ƀok Phạm Đăng Khoa, Kơdră Anih Pơtho Pơhrăm Đăk Lăk, xơnăm hŏk âu jâ̆p dêh char đei hloh 1.000 hnam trưng, hăm hloh 450.000 'nu hŏk tro tơ̆ dôm jăl hŏk.

Lêh pơtơm xơnăm hŏk 2022-2023, tơ̆ dôm hnam trưng hŏk đơ̆ng tơring tơm truh tơring ataih yaih, tơring kon kông hlôi pơgơ̆r bot kăp gĭt păng pơjing tơdrong chơt hơ iă ăn bơngai pơtho păng hŏk tro dêh char Đăk Lăk lơ̆m xơnăm hŏk 'nao. Tơ̆ lêh pơtơm xơnăm hŏk 'nao 2022-2023 kơ hnam trưng THPT hŏk oei hadoi Nơ Trang Lơng, pơlei tơm Buôn Ma Thuột, dêh char Đăk Lăk, ƀok Bùi Xuân Lễ, kơdră hnam trưng ăn tơbăt: Hăm xơnong jang kăp gĭt noh hơtŏk pơ 'lơ̆ng pơtho pơhrăm jing tơdrong dơnơm, bơngai pơtho păng hŏk tro hnam trưng THPT kon kông hŏk oei hadoi Nơ Trang Lơng pơtoi hơtŏk pran trong pơtho păng hŏk pơhrăm.

 - Tơ̆ dêh char Dak Nông, hlŏh 184.000 ‘nu hŏk tro hlôi mơ̆t hŏk pơhrăm, iŏk đơ̆ng blŭng sơnăm hŏk ‘nao 2022-2023. Sơnăm hŏk au, lơ̆m dêh char Dak Nông đei 368 hnam trương, hăm 184.135 ‘nu hŏk tro, tŏk 8.508 ‘nu hŏk tro pơtêng hăm sơnăm hŏk hơdrol.

Hơmet ăn sơnăm hŏk ‘nao, đơ̆ng rim kon jên jang, dêh char Dak Nông tơmơ̆t jang vă jê̆ 330 ti tơ iung pơjing, ming hơmet hnam trương lăm hŏk păng răt kmăi kmŏk pơtho pơhrăm. Dơnŏ anĭh vei lăng hnam trương pơtho pơhrăm jei iung jang rim tơnô̆ răt kơsơ̆p hla bơar hŏk, hla bơar chĭh ƀơk ăn hŏk tro kon kông; răt dơ̆ng kmăi kmŏk pơtho hŏk tơgŭm ăn pơtho pơhrăm kiơ̆ chăl ‘nao, kmăi kmŏk tơgŭm ăn hŏk trư̆k  hăm kon jên hlŏh 67 tỷ đồng. Sơnăm hŏk au, mă đơ̆ng tơmơ̆t dơ̆ng 115 ‘nu ƀok thây kô pơtho mă leŏm lơ̆m dêh char Dak Nông oei ư̆h kơ măh 966 ‘nu ƀok thây kô. Rim tơring hlôi tơlĕch pơtrŭh ƀok thây kô păng pơtho ming ƀok thây kô pơtho jăl kơ đĕh gơ̆h chă pơtho hloi rim tơdrong hŏk tơplŏng kơdau, kmăi kmŏk. Rim hnam trương pơjing rơvơn ăn ƀok thây kô, bơngai jang hŏk văn ƀăng 2 sư pham pơtho nơ̆r Anh, Tin hŏk vă pơjao pơtho jăl kơđĕh ...

– Xơnăm hŏk 2022-2023, dêh char Lâm Đồng đei hloh 330.000 'nu hŏk tro dôm jăl hŏk. Vă vei xơđơ̆ng tơdrong pơtho pơhrăm đei jơneit ơnăp, anih jang pơtho pơhrăm dêh char Lâm Đồng hlôi keh đang tơdrong pơhrăm ăn bơngai pơtho kiơ̆ tơdrong pơtho phôh thŏng 'nao hăm lăm 3, 7 păng lăm 10.

Đơ̆ng jên axong mă blŭng 600 rơtăl hlj hlôi đei dêh char axong, anih pơtho pơhrăm Lâm Đồng hlôi hăt hot pơtơm 2 tơdrong jang 'nao, pơm jang đei 26 tơdrong jang pơtoi păng 24 tơdrong jang keh đang. Mă kăl, tơtom hơmet đang 19 hnam trưng hŏk hăm kơsô̆ jên 35 rơtăl hlj, axong hloh 120 rơtăl hlj răt tơmam drăm pơtho hŏk pơhrăm, mă kăl noh vei xơđơ̆ng tơdrong pơkăp ăn pơtho hŏk pơhrăm kơ xơnăm hŏk 'nao, jô̆ hloi dôm tơring ataih yaih, tơring kon pơlei kon kông. Atŭm hăm noh, vei xơđơ̆ng dôm pơkăp pơtho pơhrăm, anih jang pơtho pơhrăm dêh char Lâm Đồng duh tŏk bŏk jang atŭm hăm anih jang y tê̆ tơ̆ tơring hơtŏk tenh tơdrong ƀet vaccine Covid-19 ăn hŏk tro kiơ̆ trŏ nhen tơchơ̆t.

- Sơnăm hŏk 2022 – 2023, dêh char Gia Lai đei 762 hnam trương pơtho pơhrăm hăm hlŏh 400.000 ‘nu hŏk tro. Pơm lêh mơ̆t hŏk sơnăm hŏk ‘nao đei rim hnam trương pơgơ̆r ‘lơ̆ng hơ iă atŭm hăm pơgơ̆r jŏh hơri pơjing ăn jơ ‘năr chơt hơ iă ‘nă hal kơ năr pơm lêh mơ̆t hŏk pơhrăm đơ̆ng rong mĭnh sơnăm mơmat tat kơ yuơ đei ƀơm kơnê̆ đơ̆ng jĭ hơbŭh Covid-19.

Tơblơ̆ nơ̆r: Amazưt - Lan