VOV4.Bahnar – Tơring Tây Nguyên to\k bo\k dơ\ng ăh anăp trong hơto\k tơ iung, hăm 4 lơ\m 5 dêh char gô đei jăl trong tih lơ\m khei năr truh. Dang ei, Jơnu\m pơgơ\r dôm tơring  to\k bo\k oei tơhri dăp đon jang atu\m hăm rim anih jang tơm, anih jang đei tơre\k vă hơto\k tenh tơdrong ming man. Anih jang mu\k drăm păng kon pơlei lơ\m tơring adoi hơpơi ‘moih găh tơdrong hơto\k tơ iung ‘nao kiơ\ dôm jăl trong tih âu.

Hăm tơdrong pơkăl hăt hot đơ\ng Tơchơ\t ming man jăl trong tih Khánh Hòa - Buôn Ma Thuột hăm tơdrong hơto\k mu\k drăm – tơpôl, khei 7 âu ki, Khul kơpal Ho#i đo\ng kon pơlei dêh char Khánh Hòa hlôi tơle\ch ‘Măng hop ako\m jua\t jang, păng hơlen Tơchơ\t găh axong jên ming man ăn jăl xơnăm 2021 – 2025, đơ\ng jên mong kơ tơring pơkăp je# 350 tih hlj vă tơle\ch pơm jang. {ok Trần Mạnh Dũng, Pho\ Kơdră Ho#i đo\ng kon pơlei dêh char Khánh Hòa ăn tơbăt:  “’Nâu jing tơdrong ming man dơnơm, pơm trong vă hơto\k mu\k drăm – tơpôl kơ 2 dêh char Đăk Lăk păng Khánh Hòa. Mă kăl noh xơng io\k tơdrong axong hơto\k tơ iung kơ Tơring jang mu\k drăm Vân Phong, dơno\k duk Vân  Phong ‘măn ăn tơdrong te\ch răt tơmam ăn teh đak đe lơ tơmam choh pơtăm kơ Đăk Lăk. Khul kơpal teh đak păng Kuôk ho#i duh hlôi tơre\k, đei xơnong kơ dêh char vei xơđơ\ng jên jang hadoi hăm Trung ương. Xơnong jang kơ Ho#i đo\ng kon pơlei atu\m hăm Anih vei lăng kon pơlei athei tơche\ng pơkăp”

        Tơdrong vă man trong tih Khánh Hòa - Buôn Ma Thuột jing minh lơ\m dôm tơdrong ming man kăp g^t kơ teh đak đei Khul kơpal teh đak pơkăl Kuôk ho#i tơchơ\t axong jang kiơ\ pơkăp kơ teh đak. Trong ataih pơhlom 117 km hăm pơkăp 4 tong gre yak hadoi păng kơche\ng gô tơle\ch man lơ\m xơnăm 2023, keh đang ăh xơnăm 2025. Tơdrong man trong găn dêh char Khánh Hòa gô tơgop tơgu\m tơring hrôih hơmet hơto\k mu\k drăm – tơpôl; pơm trong ăn tơroh jang hadoi đơ\ng Khánh Hòa păng dôm dêh char Tây Nguyên.

Găh pơbăh Tây Nguyên, dêh char Lâm Đồng hlôi hơmet tôm pơkăp, kơchăng tơle\ch ming man jăl trong tih Tân Phú – Bảo Lộc păng Bảo Lộc - Liên Khương kơtă ăh Thủ tướng teh đak k^ pơkăp axong jang.

Jăl trong tih Dầu Giây - Liên Khương ataih pơhlom 200km, đei axong jing 3 tơdrong jang noh: Dầu Giây - Tân Phú, Tân Phú - Bảo Lộc păng Bảo Lộc - Liên Khương. {ok Trần Văn Hiệp, Kơdră Anih vei lăng kon pơlei dêh char Lâm Đồng ăn tơbăt, dêh char gô axong 15.300 tih hlj ăn 2 tơdrong ming man jăl trong tih tơ\ tơring, jăl Tân Phú - Bảo Lộc păng Bảo Lộc - Liên Khương: “Jăl trong tih tơmơ\t kơdâu mưh hrôih keh đang noh ăh je# đ^ xơnăm 2025, mưh klui noh ăh khei 6/2026. Inh xơkơ\t hăp gô pơkăl trong hơto\k tơ iung ning nai kơnh kơ dêh char Lâm Đồng, tơplih tôm um ai kơ dêh char Lâm Đồng. Đơ\ng âu năm tơ\ pơlei tơm HCM pơhlom đ^ 8-9 jơ, ‘năr lêh noh 10-12 jơ gô pơm kơđeh oei pă 3-3,5 jơ, adar hloh noh 4 jơ. Tơdrong chơ ‘nhot pơkao, tơmam choh pơtăm năm tơ\ pơlei tơm HCM [ônh hiôk hloh, đang kơ noh chơ ‘nhăk kơmăi kơmo\k tơmam drăm adoi tenh bot dơ\ng”

Hadoi nhen noh, năr 17/8 âu ki, Anih vei lăng kon pơlei dêh char Đăk Nông păng Anih vei lăng kon pơlei dêh char Bình Phước hlôi đei jơ bơ\ jang hăm Anih jang Vingroup păng Anih mong jên Te\ch pơdro kôh phân Kỹ thương Việt Nam găh tơdrong axong ming man jăl trong tih Tu – Pơbăh găh pơmơ\t ăh jăl Gia Nghĩa - Chơn Thành, hăm kơso# ataih pơhlom 130km. Tơ\ jơ bơ\ jang, khul kơpal kơ dôm anih jang, păng rim tơring mă đei pơkăp ming man găn ga adoi xơkơ\t tơdrong kăp g^t kơ jăl trong tih Đăk Nông - Chơn Thành. Tơdrong mă âu gô pơm trong hiôk hơto\k tơ iung ăn 2 tơring, pơm tro\ tơdrong gô chang đơ\ng kon pơlei 2 dêh char. Pơma ăh jơ bơ\ jang, Kơdră Anih vei lăng kon pơlei dêh char Đăk Nông Hồ Văn Mười xơkơ\t, yak hadoi hăm Bình Phước lơ\m tơdrong hơto\k ming man. Tơdrong man trong tih âu vă pơjing tơdrong hơto\k mu\k drăm – tơpôl kơ dêh char Đăk Nông pơma adro# păng Tây Nguyên pơma atu\m.

         Oei găh tơring Tu Tây Nguyên, ‘nao âu Anih vei lăng kon pơlei dêh char Gia Lai duh hlôi đei hla bar pơkăp pơjao ăn Anih jang găh trong nơnăm chơ pơdu\ tơmam drăm dêh char jang atu\m hăm minh [ar anih jang tơle\ch hơlen tơdrong axong jang, chih hla bar tơle\ch Man jăl trong tih Pleiku  - Quy Nhơn (dêh char Bình Định). 

Kiơ\ hla bar tơchơ\t ăh xơnăm 2020 kơ 3 dêh char Gia Lai, Kon Tum, Bình Định pơtrruh ăn Khul kơpal teh đak, kơche\ng vă man trong tih Pleiku - Quy Nhơn, ataih 160 km, hăm jên axong man 56.000 tih hlj.  Năr 22/5/2022, pơma tơ\ jơ bơ\ jang hăm Thủ tướng teh đak bơ\n Phạm Minh Chính, [ok Hồ Văn Niên – {^ thư Anih jang kơpal dêh char Gia Lai pơtrruh nơ\r hăm Khul Kơpal teh đak axong jên pơm jang jăl xơnăm 2026 - 2030 dăh mă pơjao ăn dôm anih jang tơm, anih jang Trung ương tơgu\m dêh char Gia Lai chơ chă anih vang jang vă hrôih dăh tơle\ch ming man adrol kơ xơnăm 2030: “Nhôn duh pơma dơnuh hăm đe kơpal tơ\ Bình Định, 2 tơring kho\m mă tơle\ch man trong tih âu. Mưh tơroi găh trong tih lơ\m tơring kơ teh đak, Tây Nguyên tam mă đei vă minh met jăl trong yơ. ‘Nâu jing tơdrong ưh pơyua tih tên ăn dôm dêh char Tây Nguyên. Nhôn kơche\ng, mưh nhen anih jang, mă hăt noh trong nơnăm ưh đei axong ming man, mă hăt noh jăl trong tih đơ\ng Gia Lai pơma adro#, Tây Nguyên pơma atu\m hăm dôm tơring tơ\ ter đak dơx^ To\k bo\k, Hle\ch Pơbăh, Pơmơ\t Pơbăh păng dôm dêh char găh tu gô ưh tam mă tôm tơpă”.

         Hăm dôm tơdrong vă man trong tih hlôi păng to\k bo\k đei tơle\ch jang, tơring Tây Nguyên to\k bo\k tơ\ anăp trong hơto\k tơ iung ‘nao. Anih jang mu\k drăm păng kon pơlei lơ\m tơring to\k bo\k oei gơnơm lơ găh tơdrong hơto\k tơ iung pran kiơ\ dôm jăl trong tih âu.

Lan chih păng pơre nơ\r