VOV4.Bahnar - Tơ̆ tơ ring Tây Nguyên, khul kơ dră pơ gơ̆r păng dôm anih jang kơ pal oei akŏm jơ hngâm tơ lĕch lơ trong tơ jră hăm ‘mi kial kơ sô̆ 4. Pơ gê 27/9, dêh char Kon Tum hlôi pơ jing 3 khul jang năm tơ̆ dôm apŭng hơ mơt pŭ răm dêh hlŏh đơ̆ng ‘mi kial kơ sô̆ 4 vă hơ nơ̆ng dăr hơ len năng. Dôm apŭng tơ̆ dêh char Kon Tum đei năng gô pŭ răm dêh đơ̆ng ‘mi kial kơ sô̆ 4 tơ hlu tŏk tơ̆ kông, đei: Đăk Glei, Tu Mrông, Kon Rẫy păng Kon Plông. Khul kơ dră pơ gơ̆r păng anih jang kơ pal chông tơ lĕch kon pơ lei đơ̆ng dôm tơ ring krê kơ tĕh hơ lih tŏk oei tơ̆ tơ ring sơ đơ̆ng.

Trư̆k vei lăng kơ măy ƀiên ap 500 kV Pleiku vă tơ jră hăm ‘mi kial kơ sô̆ 4

Tơ̆ Gia Lai, Công ty pơ truh unh điên Gia Lai pơ gơ̆r hơ len năng dôm anih krê hơ mơt, pơ gơ̆r hơ met pơ ‘lơ̆ng, kôch hơ met hơ bong đak ro vă pơm ‘lơ̆ng, huei đei tĕh hơ lih. Tơ̆ Dak Lak, ‘nâu jĭ dêh char đei dơ nâu đak tih lơ hlŏh tơ̆ Tây Nguyên, kơ na tơ drong vei lăng dơ nâu đak tôch đei năng kăl, pơm ‘lơ̆ng tơ drong pơ tơ̆ng, pơ chŏh đak păng tang găn đak lơ̆p mưh ‘mi kial truh. Oei tơ̆ dêh char Lâm Đồng hlôi đei nơ̆r pơ tho ăn dôm công ty oei vei lăng, iŏk yoa dơ nâu đak Hnam kơ măy unh điên, bơ̆ jang mă trŏ hăm tơ drong hơ găt.

VOV Tây Nguyên - Dơ̆ng: Tơ blơ̆