VOV4.Bahnar - Năr ‘nâu (1/6) jĭ Năr apŭng plenh tĕh kơ đe hơ iŏh. Kŭm hăm jơ̆p tơ ring lơ̆m tĕh đak, tơ̆ tơ ring Tây Nguyên ‘măng mă âu kŭm đei lơ tơ drong jang tôch hơ iă ăn đe hơ iŏh. Khei 6 kŭm jing “Khei bơ̆ jang yoa đe hơ iŏh”, anih jang kơ pal păng dôm khul grŭp tơ pôl tôch tơ rĕk truh tơ drong pơ gơ̆r ngôi pơ chơt vă đe kon mon đei 1 pơ yan pơ dơ̆h he chơt hơ iă păng sơ đơ̆ng ‘lơ̆ng.

Sơ năm hŏk vă tôch bơih, dôm Anih pơ tâp pơ hrăm, Hnam jŏh hơ ri hơ xoang tơ̆ Kon Tum pơ gơ̆r lơ tơ drong ngôi pơ chơt pơ yan he sơ năm 2022 păng pơ tơm sơng iŏk đe hơ iŏh mât hŏk pơ hrăm tơ̆ dôm lăm hŏk chok, hŏk glơi, hŏk čhơ̆, hŏk nơ̆r Anh… ‘Ngoăih kơ dôm lăm hŏk đei pơih tơ̆ dôm anih pơ tâp pơ hrăm, hnam jŏh hơ ri hơ xoang yoa anih jang kơ pal vei lăng, đe ŏh hơ iŏh oei gơ̆h truh hăm lơ tơ drong ngôi pơ chơt nai kiơ̆ đơ̆ng dôm Câu lạc bộ dăh mă grŭp ‘mĕh vă yoa kơ dih kâu pơ gơ̆r.

Mŏ Nguyễn Thị Tuyết Mai, Kơ dră Anih pơ tho pơ hrăm Đoàn- Khul hơ iŏh păng roi tơ ƀôh tơ drong jang, Anih jŏh ayŏ kơ dŏ xoang, tơ plŏng kơ dâu kơ đe hơ iŏh dêh char Kon Tum ăn tơ băt, anih hlôi hơ met tôm tơ drong tơ dăh kơ sô̆ hơ iŏh vang truh hŏk tơ̆ dôm lăm pơ tâp pơ hrăm pơ yan he sơ năm ‘nâu tŏk lơ. “Ngoăih kơ bơ ngai pơ tho đơ̆ng Anih pơ tâp pơ hrăm dang ei nhôn oei krao hloi lơ bơ ngai vang jang, đe thây kô hŏk đei tôm ƀăng, gơ̆h hơ gei găh tơ plŏng kơ dâu vă pơih lăm pơ tho ăn đe hơ iŏh găh tơ drong jang lơ̆m Khul dơ̆ng. Găh tơ mam drăm Khul kơ dră chĕp kơ̆l Anih pơ tâp pơ hrăm kŭm tơ rĕk truh dôm tơ mam nhen, tơ mam hŏk pơ hrăm ăn đe ŏh, vă đe ŏh hŏk pơ hrăm đei yoa ƀiơ̆, chơt, păng ‘lơ̆ng hơ iă ƀiơ̆”. 

Lăm hŏk găh tơ drong jang lơ̆m Khul kơ dêh char Kon Tum

‘Nao âu, Anih vei lăng jŏh ayŏ kơ dŏ xoang, tơ plŏng kơ dâu păng chă tơ mang lăng dêh char Kon Tum pơ gơ̆r tơ drong thi “Hơ iŏh roi tơ băt găh kơ sơ̆p hla ar đŏk”, sơng đei vă jê̆ 80 ‘nu hŏk tro truh đơ̆ng dôm hnam trưng mâm non, jăl 1 păng jăl 2. Đe ŏh tơ ƀôh hơ dăh tơ drong rơ gei đơ̆ng kơ dih kâu vă roi tơ băt, hăm hlŏh 40 tơ drong tơ roi tôch hơ iă. Hơ iă hlŏh jĭ tơ drong tơ roi hơ ‘mon, bơ ngai ‘lơ̆ng, tơ drong jang ‘lơ̆ng, tơ roi truh mĕ ƀă păng Ƀok Hô ‘mêm kơ eng.

Ŏh Nguyễn Lê Thảo Ngọc, Hŏk tro lăm 5A, Hnam trưng jăl 1 kơ sô̆ 1, thĭ trơ̆n Plei Kần, apŭng Ngọc Hồi, ăn tơ băt: “Kon ‘nao tơ roi kơ Bơ ngai mĕ kơ tang nuih mơng Nguyễn Thị Thứ. Kon ‘mĕh tơ roi ăn rim bơ ngai bơ̆n oei arih lơ̆m khei ‘năr rơ ngei hiôk hian. Tơ drong tơ roi âu tơ tă ăn kơ bơ̆n arih xa thoi yơ vă tơ găl hăm tơ drong lôch tang đơ̆ng chăl mĕ ƀă adrol sơ̆. Kon vang thi tơ drong thi ‘nâu, kon ƀôh ‘nâu jĭ 1 anih ngôi pơ chơt tôch hơ iă. Ưh lăp thoi nŏh đĕch mă sư oei hơ nhăk ba nơ̆r tơ băt tôch ‘lơ̆ng, tôch gĭt găl lơ̆m tơ drong arih, tơ gŭm ăn đe kon đei dơ̆ng đon adrin vă hŏk pơ hrăm”.

Oei tơ̆ Dak Lak, Anih jang đoan dêh char pơ gơ̆r pôk pơ ư đe hơ iŏh bơ̆ jang ‘lơ̆ng “5 tơ drong Ƀok Hô pơ tho”. Khei ‘năr âu ki, dôm tơ drong jang đơ̆ng đe hơ iŏh Dak Lak tơ gop ăn Pơ gar pơ kao Rơ bâu tơ drong ‘lơ̆ng vă vang pơ jing pơ lei pơ la pơ drŏng, ‘lơ̆ng rŏ. Hơ iă hlŏh jĭ, tơ drong Thi bơ̆ jang ‘lơ̆ng 5 tơ drong Ƀok Hô pơ tho; Mât 1 ƀơ̆r đon vang tơ gŭm ăn boăl năm hŏk hue lăng truh ning mônh kơnh, dôm tơ drong jang Trần Quốc Toản, Tơ pang ti bôl boăl… păng dôm tơ drong jang tơ gŭm ăn bơ ngai đei kŏng. Đơ̆ng dôm tơ drong jang ‘nŏh đei ƀôh lơ hơ iŏh rơ gei.

Ŏh Dương Thị Ngọc Anh, hŏk tro lăm  9, Hnam trưng tĕh đak rong hŏk tro kon kông apŭng M’Drak tơ roi: “Ŏh tôch hơ iă. Ŏh băt dơ̆ng lơ bôl boăl đei đon adrin thoi oh păng lơ bơ ngai pơm kiơ̆ ‘lơ̆ng 5 tơ drong Ƀok Hô pơ tho pơ tho. Truh âu kơnh ŏh vă hơ nơ̆ng bơ̆ jang lơ̆m dôm tơ drong jang tơ̆ hnam trưng, tơ̆ lăm hŏk, đơ̆ng apŭng tơ lĕch tơ dăh đei, păng ŏh vă pơ lung bôl boăl nai vang jang kiơ̆, adrin thoi ŏh ‘năi”.

Dak Lak tơ lĕch tơ drong jang pơ yan he truh hăm đe ŏh hŏk tro tơ̆ tơ ring mơ mat tat

Tơ rĕk truh tơ drong ngôi pơ chơt đơ̆ng đe hơ iŏh tơ̆ tơ ring lơ̆m pơ yan he, Anih jang đoan dêh char Dak Lak pơ gơ̆r pơih lăm pơ tho pơ hrăm tơ drong jang ăn đe kăn ƀô̆ đoan, khul tơ̆ pơ lei pơ la, kueng kơ phô̆ lơ̆m dêh char. ‘Nŏh jĭ dôm tơ drong jang: hơ xoang pơ chơt hơ dai; roi tơ băt tơ drong jang đoan, khul kiơ̆ đơ̆ng mang tơ pôl; iung pơ ma tơ̆ hơ năp lơ bơ ngai păng dôm tơ drong kăl nai đơ̆ng Bí thư chi đoàn. Mŏ Vũ Lê Thanh Ngân, Chi đoàn 5, phương Tân An, plt Buôn Ma Thuột, tơ roi: “Truh âu kơnh pơ gơ̆r pơ yan pơ dơ̆h he ăn đe hơ iŏh tơ̆ tơ ring inh vă pơm kiơ̆ dôm tơ drong mă inh hlôi đei hŏk. Pơ tih gia pơ tho trong pơ gơ̆r jang hơ doi lơ̆m grŭp, trong pơ gơ̆r hơ xoang pơ chơt, athei pơm thoi yơ vă akŏm đei lơ druh dăm, inh kŭm oei chă hŏk iŏk dơ̆ng đơ̆ng đe kăn ƀô̆ Đoàn xăh, phương nai vă hơ met ăn kơ dih kâu dôm tơ drong kăl, pơm thoi yơ vă gơ̆h pơ gơ̆r đei 1 tơ drong jang, tơ drong pơ chơt đei yoa tơ pă”.

‘Nhŏng Trần Doãn Tới, Phŏ Bí thư đoan dêh char, Kơ dră vei lăng Khul hơ iŏh dêh char ăn tơ băt, rim anih jang đoan jang hơ doi tôch kơ jăp hăm dôm anih jang, dôm hnam trưng vă sơng đe hŏk tro truh ngôi pơ chơt, hŏk pơ hrăm pơ yan he tơ̆ tơ ring, hơ tŏk tơ drong đei yoa đơ̆ng vei lăng, pơ jing anih ngôi pơ chơt ăn đe hơ iŏh, găn tôch ai dôm tơ drong krê hơ mơt hăm đe ŏh lơ̆m pơ yan pơ dơ̆h he: “Mă 1 pơ tho trong bơ̆ jang ăn đe kăn ƀô̆ Khul tơ̆ xăh. Mă 2 hơ tŏk tơ drong jang hơ doi đơ̆ng đoan hăm Khul hơ iŏh tơ̆ xăh, dôm khul hơ iŏh tơ̆ tơ ring. Mă 3, hơ tŏk tơ drong jang hơ doi hăm dôm anih jang kơ pal vă gơ̆h băt hơ dăh rim tơ drong ƀơm truh tơ̆ hơ iŏh păng bơ̆ jang kiơ̆ Luơ̆t đe hơ iŏh sơ năm 2017”.

Kŭm hăm ‘nŏh, Anih jang đoan dêh char Dak Lak oei hơ nơ̆ng krao hơ vơn tơ pôl vang bơ̆ jang vă pơ jing anih ngôi pơ chơt ăn đe hơ iŏh, pơih dôm anih pơm ngôi pơ yan he ăn hơ iŏh. Pơih lơ lăm hŏk pơ hrăm pơ yan he ăn đe ŏh hŏk tro tơ̆ tơ ring mơ mat tat, tơ ring hơ tăih yăih vă hơ tŏk tơ drong hlôh vao ăn đe ŏh đơ̆ng rŏng đunh khei ‘năr athei hŏk trư̆k tuyê̆n.

Dơ̆ng: Tơ blơ̆