Lơ̆m kơsô̆ vă jê̆ 2,6 triu ‘nu bơngai tăh hla lơ̆m dêh char Lâm Đồng iŏk đei 99,66% ‘nu bơngai tăh hla hlôi năm pôk rơih. Lơ̆m kơsô̆ âu đei 59/124 tơ̆ xăh; 1.951/2.296 anih tăh kơphĭu đei 100% bơngai tăh hla năm pôk rơih. Kiơ̆ tơdrong tơchĕng đơ̆ng Anih pơgơ̆r pôk rơih dêh char Lâm Đồng, bơngai tăh hla lơ̆m dêh char tôch hơiă mưh năm pôk rơih, tơƀôh đon tơgŭm, lui ngeh lơ̆m tơdrong pôk rơih. Bơngai tăh hla hơnơ̆ng chă đŏk hơlen hơnăn, tơdrong arih xa, bơ̆ jang păng tơdrong vă jang đơ̆ng dôm bơngai tang măt adrol vă pôk rơih. Tơpôl kon pơlei  tơchĕng ‘lơ̆ng, tơƀôh hơdăh đon tơnăp, mât 1 ƀơ̆r đon păng lui kơ tơdrong pôk rơih đei pơgơ̆r ‘lơ̆ng hơiă.

Dêh char Gia Lai hlôi đei 99,76% bơngai tah hla năm pôk rơih bơngai jang tang măt ăn Kuô̆k hô̆i jăl 16 păng Hô̆i đŏng kon pơlei rim jăl jang, sơnăm 2026 – 2031. Dêh char Gia Lai sơkơ̆t hơdah: kơsô̆ bơngai năm tah hla 'noh lơ. Lơ̆m vă jê̆ 2,6 triu bơngai tah hla đei chih hơnăn, 99,76% bơngai tah hla hlôi pơm keh đang sơnong jang kăp gĭt kơ kon pơlei. Kăp gĭt noh, 96 lơ̆m 135 xah, phương đei bơngai năm tah hla tôm 100%. Tơdrong mă ou ăn ƀôh, tơdrong tơnăp 'lơ̆ng păng drơ̆ng lăp đơ̆ng kon pơlei hăm tơdrong jang kăp gĭt kơ teh đak, atŭm hăm noh, tơƀôh tơdrong hơmet tôm tơnăp đơ̆ng tơring. Bơngai tah hla bơnê kơ tơdrong hơmet ăn tơdrong pôk rơih dôm jăl jang kơ dêh char Gia Lai. Atŭm hăm 'noh, hơpơi 'meh rim bơngai tang măt đơ̆ng rŏng đei pôk jang, gô tơmơ̆t păng pơm jang kơyuơ tơdrong hơtŏk tơ-iung kơ tơring păng teh đak.

Anih pơgơ̆r pôk rơih dêh char Khánh Hòa ăn tơbăt, tơdrong pôk rơih Quốc hội jăl XVI păng Jơnŭm pơgơ̆r kon pơlei jơ̆p tơring đơ̆ng 2026-2031 tơ̆ dêh char đei pơgơ̆r đang ‘lơ̆ng, truh 5 jơ kơsơ̆, kơsô̆ bơngai tăh hla năm pôk rơih đei vă jê̆ 99%, 47/65 xăh, phường tơring gĭt kăl đĭ đăng bơngai tăh hla năm pôk rơih ngăl.

Ƀok Nghiêm Xuân Thành, Bí thư Đảng dêh char, Kơdră Anih pơgơ̆r pôk rơih dêh char Khánh Hòa athei dôm khul jô̆ hơlen kơphĭu bơ̆ jang mă tơnăp pơm kiơ̆ mă trŏ tơdrong jô̆ kơphĭu, hơtŏk tơdrong dăr lăng, ưh gơ̆h lê̆ đei tơdrong tơkêng tơhlâu. Dôm anih jang kơpal đei ƀơm truh athei pơm pơkeh hla ar vă tơtom roi tơbăt tơdrong pôk rơih đơ̆ng tơring ăn Anih pơgơ̆r pôk rơih kơ teh đak păng roi tơbăt kơphĭu pôk rơih đei jô̆ hơlen trŏ khei ‘năr hơgăt.