Tơ̆ Gia Lai, Hơnih vei lăng kon pơlei dêh char ‘nao tơlĕch jang kiơ̆ rim tơdrong jang kăl hloh lơ̆m sơnăm 2026, lơ̆m ou sơkơ̆t hơdăh tơmơ̆t jên jang tơ iung pơjing ming hơmet pơnơ̆t đak jĭ mĭnh lơ̆m dôm tơdrong jang kăl hloh lơ̆m tơdrong jang choh jang sa, tơring choh ang sa. Pêng hơnih pơnơ̆t đak tih hloh hăm akŏp kon jên tơmơ̆t jang dang 810 ti hlak jên gô đei iung jang lơ̆m jăl jang 2026-2030 vă hơmet pơ ‘lơ̆ng sơđơ̆ng tơdrong ‘meh vă đei đak choh jang sa păng sŏ nhă ăn tơring păh Pơmơ̆t kơ dêh char, tơring oei đei lơ trong atok tơ iung choh jang sa mă lei thoong hơbong đak, pơnơ̆t đak oei tim mă sơđơ̆ng trŏ lăp hăm tơdrong ‘meh vă.

Kiơ̆ tơlĕch jang, tơdrong ming man pơnơ̆t đak Djang tơ̆ xah Kbang vă mah đak ruih ăn 800 ha teh choh jang xa păng asong mah đak sŏ nhă ăn pơhlom 3.500 'nu bơngai. Dơnou mong đak Ka Tung tơ̆ xah Tơ Tung mah đak ruih ăn 1.000 ha teh pơm jang păng asong đak sŏ nhă ăn hloh 2.600 unh hnam kon pơlei. Dơnou mong Đăk Trau Dle tơ̆ xah Kon Chiêng asong mah đak ruih ăn 600 ha teh choh jang xa, atŭm hăm noh 'măn pơchoh đak hơbông hloi. Ƀok Cao Thanh Thương, Kơdră Hơnih Choh jang xa păng Cham char dêh char Gia Lai ăn tơbăt: “Đak mong 'măn ruih ăn tơdrong choh jang xa tơ̆ tơring gah Pơmơ̆t dêh char Gia Lai đei hloh 12%, 'noh vă iŏk yua tơnăp mŭk drăm hlôi đei, pơjing tơring pơm jang tih să ăn dêh char păng lơ̆m tơring, 'noh athei akŏm ming man thong hơbơn pơnơ̆ đak. Lơ̆m Tơchơ̆t Hop akŏm Hơnih jang Đảng dêh char Gia Lai jăl jang 2025-2030, chă hơlen lăng păng asong ming man pơnơ̆t đak vă iŏk jang kiơ̆ mŭk drăm hlôi đei gah teh, 'măn ăn tơdrong jang hơtŏk choh jang xa, mă kăl noh lơ̆m tơdrong choh pơtăm vă 'măn pơm tơlĕch tơmam drăm păng tĕch tơmam drăm ăn teh đak đe”

Lơ̆m kơplah Gia Lai akŏm ming man dơnou mong đak vă đei tôm đak lơ̆m đunh khei năr 'noh tơ̆ Đăk Lăk, tơdrong jang tang găn păng tơjră 'mi kial pơrăm tŏk bŏk đei pơm jang hăt hot kiơ̆ dôm tơdrong tơdra hơdrol gah tŏ 'mi kial ưh sơđơ̆ng 'lơ̆ng lơ̆m pơyan 'mi kial. Đơ̆ng blŭng sơnăm truh dang ei, Đăk Lăk đei 9 'măng 'mi kial pơrăm 'noh 'mi tih, grơ̆m kơmlat, kial phŭt huơ̆r, glaih taih pơm 1 'nu bơngai lôch, 85 tŏ hnam hư răm, jô̆ hơkŏp tơdrong răm pơhlom 2,86 ti hlj.

Mơ̆t ah pơyan 'mi, jơ̆p dêh char đei hloh 80 hơnih teh hơlih, lơ̆m noh đei 12 hơnih đei lăng hli hlơt hloh kăl dah hơlen hơmet tenh kuăng. Mă kăl noh, mă mơ̆t lơ̆m khei tơm kơ pơyan 'mi, tơdrong ưh kơ mah đak sŏ nhă adoi oei đei rim hơnih jang kơpal akhan, kơyuơ pơnơ̆ đak 'nao mah đak ruih ăn pơhlom 23% teh choh jang xa, lơ teh jang xa nai 'noh gơnơm lơ̆m đak 'mi đĕch. Kơ-iĕng kơdră Hơnih jang vei lăng kon pơlei dêh char Đăk Lăk Nguyễn Thiên Văn pơtruh nơ̆r:“Hăm rim hơnih jang, rim tơring, đơ̆ng chă tơroi tơbăt, kơchăng chih akŏm, tơroi ăn kon pơlei băt, hơmet tôm khŭl jang, tôm tơdrong kĕ đei kơ rim hơnih jang, đơ̆ng khŭl pơm jang vă pơdrơ̆ng pơm jang lơ̆m minh tơring đei sar bar, 'noh athei đei tơdrong pơgơ̆r jang tơnăp hloh. Mưh đei sar bar 'noh athei tơlĕch tơjră tơtom, tơjur ƀiơ̆ tơdrong răm gah kon bơngai adoi nhen mŭk drăm kơ teh đak, kơ kon pơlei”

Tơdrong mă Gia Lai hơtŏk kơtang tơdrong ming man pơnơ̆ đak, lơ̆m kơplah Đăk Lăk hơtŏk dôm trong jang tang găn păng tơjră tŏ 'mi kial pơrăm ăn ƀôh: rim tơring Tây Nguyên tŏk bŏk oei tơplih đơ̆ng pơkăp tơjră jing trong jang pơtrŏ hăm tŏ 'mi kial tơlih. Tơdrong ming man thong hơbong đak, atŭm hăm tơroi tơbăt tang găn păng tơjră tŏ 'mi kial pơrăm, gô jing tơdrong kăp gĭt vă vei lăng sơđơ̆ng tơdrong hơrih ăn kon pơlei, vă pơtoi hơtŏk choh jang xa kơjăp sơđơ̆ng lơ̆m khei năr tŏ 'mi kial roi năr roi tơplih ưh kơ 'lơ̆ng.