Kơ iĕng Thủ tướng athei khul bơ̆ jang iung jang đĭ ai, lơ̆m năr hloi, kăl yông pơ đĭ kon pơlei oei lơ̆m thôn 1, thôn 2 păng thôn 3, năm truh hơnih sơđơ̆ng; proh hơmet gre, kmăi kmŏk, tơmam drăm hơmơt đei ‘mi tih hơnơ̆ng pơrăm kơtang dơ̆ng. Ƀok pơma hơdăh, ưh kơ gơ̆h lê̆ kon pơlei tơhlăk tơhlĭn mưh đak truh tĕnh koăng; adoi athei tơring hơvơn bơ̆n kanô, duk, thŏng nan iung jang dŏng tơgŭm. Tơ̆ hơnăp tơdra hơdrol ‘mi tih oei hơnơ̆ng pơrăm kơtang tơ̆ Khánh Hòa, Đắk Lắk păng Gia Lai, Kơ iĕng Thủ tướng tơbăt Trung ương hlôi athei rim tơring tơ iung pơjing trong jang tang găn hơlou, sơđơ̆ng dơ̆ng kơjăp ăn kon pơlei; adoi pơrô̆ athei Quân khu 5 tơgŭm djru đĭ ai găh phe sa ƀa sŏng, tơmam sa, lơ̆m ou đei lương khô.

Truh ‘năr dơ̆ng ‘năr (19/11), ‘mi tih tôch kơ dêh tơ̆ tơring Tŏk bŏk, Tây Nguyên hlôi pơm ăn 15 ‘nu lôch păng hiong dong, 19 ‘nu rơka. Tơdrong ‘mi tih tŏk bŏk tôch kơ krê hơmơt. Dôm dêh char Gia Lai păng Đắk Lắk đei đak ‘mi tih tôch kơ dêh, đei tơring truh 660mm.Hiong răm găh hnam oei tôch kơ tih hăm hloh 20.400 tŏ hnam đei đak lơ̆p, găh lơ akŏm tơ̆ Gia Lai păng Khánh Hòa. Tơdrong jang tơ jră tŏk bŏk đei tơlĕch jang hăt hot. Truh dang ei, akŏm đĭ đăng 5.634 ŭnh hnam hăm vă jê̆ 16.000 ‘nu hlôi đei yông tơklăh hăt hot truh hơnih oei sơđơ̆ng. Anih jang kơpal hlôi tơlĕch ăn roi tơbăt hăt hot tơ̆ đak krong Ba tơ̆ Đắk Lắk păng đak krong Kôn tơ̆ Gia Lai, hăm đak dang ei tŏk tôch kơ lơ. Tơdra hơdrol truh kơmăng 20/11, tơring đơ̆ng Đà Nẵng truh Khánh Hòa păng Tây Nguyên oei hơnơ̆ng đei ‘mi tih, đei tơring hloh 400mm. Kon pơlei kăl pơm kiơ̆ pơtho yông tơklăh đơ̆ng khŭl kơdră tơring.

- Tơring păh Hơlech dêh char Đắk Lắk đei ƀôh ‘mi tôch kơ tih đơ̆ng năr 15 truh năr 19/11. Dang ei 34 tơring, phương păh Hơlĕch atŭm hăm lơ tơring thŭng găh tơring M’Đrắk, Krông Bông, Ea Súp, Krông Ana… tŏk bŏk đak lip lơ̆p jrŭ đơ̆ng 1-1,5m, lơ tơring ưh kơ gơ̆h lĕch tơ̆ nai. Hloh 1.000ha ‘long pơtăm răm đak lơ̆p, hloh 300 tŏ kon tơrong păng dang 5.000 tŏ kon kơlap răm đak jroh hŭt; lơ trong nơnăm đak lơ̆p, teh tơdrŭt hơlih, hư răm kơtang. Khul kơdră tơring hlôi yông kon pơlei lĕch veh đơ̆ng tơring hơmơt đei teh tơdrŭt hơlih, đak lŏk jroh. Pơgê năr 19/11, tơ̆ phương Sông Cầu, hlôi đei kông hơlih kơtĭt hnam păng pơm ăn mŏ V.T.U (33 sơnăm), Bí thư Chi đoàn koeng kơphô̆ Dân Phú 2, lôch. Rim khul bơ̆ jang gak vei lăng lơ̆m dêh char hơnơ̆ng lăng hơlen tơdrong ‘mi kial hơbŭt hơbông pơrăm păng tơlĕch rim trong jang vei lăng năng tông kon pơlei tơ̆ tơring ưh sơđơ̆ng.

‘Mi tih pơdui đunh hlôi pơm ăn đak lơ̆p tơ̆ lơ tơring, athei 38 hnam trưng hăm hloh 26.000 hŏk tro tơ̆ Gia Lai măh pơdơh kơ hŏk vă vei sơđơ̆ng ‘lơ̆ng. Hơdrol ‘noh, tơ̆ dôm ‘măng hop akŏm trực tuyến hăm dôm anih jang păng 135 xăh, phường vă tơlĕch jang dôm trong jang tơ jră ‘mi tih păng teh hơlih, Phŏ Kơdră Anih vei lăng kon pơlei dêh char Nguyễn Tuấn Thanh athei anih jang pơtho pơhrăm lăng kiơ̆ tơplih đơ̆ng ‘mi kial vă kơchăng ăn hŏk tro pơdơh hŏk.

Lăp đơ̆ng rŏng athei, Anih vei lăng găh pơtho pơhrăm dêh char Gia Lai tơlĕch ăn hla ar athei dôm anih jang ưh kơ gơh pơm pơhơi; hơmet tôm hăm tơdrong ‘mi sa roi dêh, đak tŏk hrĕnh, veh ver lê̆ kơ đei ưh kơ ê. Dôm hnam trưng đei athei răp hơlen kơjăp tơdrong kơtơ̆ng ang roi tơbăt lê̆ hơdrol, tơdra hơdrol; roi tơbăt tơdrong hơmơt đak lơ̆p, đak jroh, teh hơlih; roi tơbăt tơtom ăn thây kô pơtho, hŏk tro vă kơchăng tang găn.