Tơdrong iŏk kơmâu ADN đei tơmơ̆t yua hăm pơđĭ ŭnh hnam linh lôch tang ăn teh đak tam mă chă ƀôh pơsat dăh mă pơsat ưh kơ đei kơting păng đei bơ̆jang kiơ̆ tơdrong kăl tơgŭm hơdrol iŏk kơmâu kiơ̆ kơtŏng mĕ. Hăm linh drŏ nglo lôch tang ăn teh đak, iŏk hơdrol ‘noh mĕ rơneh, yă păih mĕ, đơ̆ng rŏng ‘noh truh tơ̆ mih nă, duch ma pôm mĕ ƀă păng dôm bơngai lơ̆m ŭnh hnam nai găh păih mĕ. Hăm linh drŏ kăn lôch tang ăn teh đak, tơgŭm hơdro ‘noh mĕ rơneh, kon rơneh, mon păih mĕ đang kơ ‘noh mă truh tơ̆ ‘nhŏng, mŏ, oh pôm mĕ păng dôm bơngai lơ̆m ŭnh hnam nai kiơ̆ tơdrong hơgăt.

Yă Nguyễn Thị Thanh Lịch, Phŏ Kơdră Anih vei lăng kon pơlei dêh char, Kơdră Anih pơgơ̆r jang tơchă, sir iŏk akŏm păng hơlen lăng hơnăn kơting linh lôch tang ăn teh đak dêh char Gia Lai tơbăt, tơdrong iŏk kơmâu ADN ‘noh jĭ hơnăp jang chĭnh trĭ đei tơdrong ‘lơ̆ng gĭt kăl, tơƀôh jơhngơ̆m đon “Nhă đak ƀlŏk kơtu”, vă ƀlŏk hơdơ̆r kơ đe linh lôch tang ăn teh đak hlôi hŭt hơkâu vei lăng teh đak.

“Jăh băt hơdăh đei hơnăn linh lôch tang ăn teh đak, ba dôm linh lôch tang ăn teh đak vih ăn ŭnh hnam kơdih ‘noh jĭ 1 lơ̆m dôm hơnăp jang athei nhôn yak hloh pơmat tat vă bơ̆jang. Mă loi ‘noh tơbăt 80 sơnăm năr linh jĭ rơka linh lôch tang ăn teh đak ‘noh jĭ ‘măng vă dôm khŭl jơhnơr đơ̆ng rŏng ƀlŏk hơdơ̆r hăm tơdrong vang tơgop đơ̆ng đe linh lôch tang ăn teh đak, ăn tơdrong rơngei hiôk hian kơ teh đak. Jang tơpă đei jơnei ‘lơ̆ng hloh băt hơdăh đei ADN linh lôch tang ăn teh đak, tơchă đei ŭnh hnam linh lôch tang ăn teh đak”.

Lơ̆m 2 năr, 1 păng 2/7, kiơ̆ đơ̆ng nơ̆r kon pơlei tơroi, Khul K51, Anih chĕp kơ̆l pơgơ̆r khul linh dêh char Đắk Lắk jang hơdoi hăm Anih chĕp kơ̆l khul linh păng Anih vei lăng kon pơlei xăh Krông Bông pơgơ̆r sir chă tơ̆ pơgar cheh phe unh hnam ƀok Ama Ô Mi, tơ̆ thôn 6, xăh Krông Bông, hơla jơ̆ng kông Chư Yang Sin. Mă hơtuch, khul jang sir akŏm đei 2 kơ̆l linh lôch tang ăn teh đak. Mưh sir chă, Khul K51 ƀôh lơ tơmam đe linh nhen, kuăl tăng, ao kaki, kơmăy pơyoa ăn đe linh krao băl, tơmam yoa kơ khul linh hlôi bŭk ôm yoa đunh khei ‘năr. Vă pơyoa ăn tơdrong pơm hơdăh, chih tơbăt hơnăn linh, khul jang kơpal iŏk kơting, sơnĕnh vă set hơlen ADN.

Tơ̆ phường Nha Trang, Anih chĕp kơ̆l pơgơ̆r khul linh dêh char Khánh Hòa pơm lêh roi tơbăt Tơdrong tơchơ̆t đơ̆ng Anih tơm vei lăng khul linh teh đak pơjing Khul năm sir chă, pôk akŏm kơting linh lôch tang ăn teh đak (kơplăh dang ei). Khul âu đei tơdrong jang jur chă tơ̆ rim tơring, chih iŏk rim nơ̆r tơroi, pơm hơdăh pơsat linh lôch tang ăn teh đak, pơgơ̆r tơchă, kôch iŏk păng akŏm kơting linh lôch tang ăn teh đak, vang tơgop bơ̆ jang ‘lơ̆ng trong jang “Mêm băt hăm bơngai đei kŏng”. Pơma nơ̆r pơjao tơdrong jang, Thiếu tướng Lương Đình Chung, Chính ủy Quân khu 5 pơma hơdăh, tơdrong tơchă, sir akŏm kơting linh lôch tang ăn teh đak ưh lăp 1 tơdrong jang hmă đĕch mă oei tơƀôh hơdăh jơhngâm đon ‘mêm băt “Nhă đak ƀlŏk kơtu”, jơhngâm ‘mêm bơnê kơ dôm bơngai hlôi lôch tang ăn tơdrong rơngei, hiôk hian kơ teh đak. Chính ủy Quân khu 5 athei kăn ƀô̆, linh vang bơ̆ jang, băt hơdăh hơnăp jang păng tơdrong gĭt kăl mưh năm jang; năng ‘nâu jĭ nơ̆r athei đơ̆ng plei nuih”, đơ̆ng tơdrong juăt ‘lơ̆ng kơ hơdrĕch hơdrung.