Kiơ̆ nơ̆r tơroi hrĕnh đơ̆ng Anih vei lăng kon pơlei xăh Yang Mao, ‘măng ‘mi tih đunh lơ̆m dôm năr âu ki pơm hiong răm tôch lơ tơ̆ tơring. Akŏm đĭ đăng hiong răm blŭng a pơhlom hlŏh 40 ti hlak jên.

Đơ̆ng rŏng kơ mơ̆ng nơ̆r tơroi păng jur lăng tơ̆ dôm anih teh hơlih, ƀok Tạ Anh Tuấn, Kơdră vei lăng kon pơlei dêh char Đắk Lắk akhan, xăh Yang Mao oei hơnơ̆ng đei tơdrong krê kơ teh hơlih yoa ‘mi lơ, teh kông krang păng lơ anih teh phui phang tơnang kŏ. Tơ̆ âu, Kơdră vei lăng kon pơlei dêh char athei Khul kơdră pơgơ̆r xăh chông tơlĕch đĭ kon pơlei arih xa tơ̆ tơring krê hơmơt, mă loi hăm hlŏh 20 unh hnam tơ̆ anih hơmơt kơ teh hơlih. Tơdrong pôk rĭ hnam, chông tơlĕch kon pơlei athei jang dang ei hloi, ưh đei gô đang hrŏ.

Phŏ Kơdră Anih vei lăng kon pơlei dêh char Gia Lai Dương Mah Tiệp ‘nao kĭ ăn hla ar athei rim tơring, anih jang lơ̆m dêh char kơchăng tơlĕch jang dôm trong jang tơ jră hăm ‘mi tih, đak lơ̆p păng teh hơlih, vă tơjur tôch ai hiong răm yua đơ̆ng ‘mi tih đak lơ̆p pơrăm.

Kiơ̆ kơ hla ar athei, 3 Anih vei lăng kon pơlei rim xăh, phường athei răp hơlen kơjăp dôm tơdrong kơtơ̆ng ang roi tơbăt hơdrol, tơdra hơdrol ‘mi tih; roi tơbăt găh pơchoh dơnâu mong đak, hơmơt kơ đak lơ̆p, đak jroh, teh hơlih... păng tơtom roi tơbăt truh khŭl kơdră tơring, kon pơlei vă kơchăng tang găn. Rim tơring kơchăng yông tơklăh kon pơlei lĕch đơ̆ng hơnih krê hơmơt; hơmet ăn tôm tơmam sa tơ̆ hơnih yông tơklăh, mă loi ‘noh jĭ tơ̆ hơnih đei hơmơt teh hơlih păng đak lơ̆p jrŭ. Khŭl lĭnh, gre, tơmam, kơmăy kơmŏk đei athei hơmet ăn kiơ̆ trong jang “4 kơtă hơnih” vă tơ jră hăm ‘mi tih pơdui đunh, mă loi ‘noh jĭ tơ̆ dôm tơring đei tơklăh hơdrô̆.

‘Mi tih 2 năr âu ki tơ̆ Khánh Hòa hlôi pơm ăn 8 ‘nu bơngai lôch, 2 ‘nu bơngai hiong hơkâu, 19 ‘nu bơngai rơka; hlŏh 7.000ha ƀa păng ƀum hơƀo đak lơ̆p; lơ anih hư pơchăh.

Tơ̆ hop akŏm hăt hot pơtho tơƀôh trong hơmet pơ ‘lơ̆ng hiong răm đơ̆ng ‘mi tih, đak lơ̆p, Bí thư Đảng dêh char Khánh Hòa Nghiêm Xuân Thành athei Anih vei lăng jang pơgang dêh char pơtruh ƀak si, kơmăy hơmet jĭ ưh iŏk jên ăn kon pơlei tơ̆ tơring hiong răm; jang kiơ̆ lơ trong tơgŭm vă kon pơlei jăh đei tơdrong arih xa sơđơ̆ng dơ̆ng. Ƀok Nghiêm Xuân Thành pơma hơdăh, lăp pơih trong ăn gre kơdâu vih vât mưh ƀôh sơđơ̆ng ‘lơ̆ng bơih đĕch; Khul jang dŏng tơgŭm athei jang hơdoi mă kơjăp, pơm ‘lơ̆ng ăn tơdrong jang chă dŏng bơngai. Dôm tơring tơ̆ tơring krê hơmơt athei hơmet tôm tơmam dŏng tơgŭm, iŏk yoa kơmăy sô̆ vă roi tơbăt păng tơjră hăm ‘mi tih đak lip.