Hăm 'mi kial đak hơbông kơtang pơm đak lip jrŭ păng tơklah hloi lơ̆m tơring gah Hơlĕch dêh char, pơgê năr 20/11, Đăk Lăk pơtruh kơthơ krao hơvơn tôm kan ƀô̆, đảng viên, kon pơlei păng anih jang mŭk drăm atŭm jơhngơ̆m tơgŭm ăn kon pơlei tơ̆ tơring đak lip. Ah jơ hop akŏm Jơnŭm pơgơ̆r jang tơgŭm dŏng kon pơlei ah pơgê năr 20/11, Ƀĭ thư Tĭnh uy Lương Nguyễn Minh Triết pơtruh nơ̆r athei akŏm tôm khul jang, tơmam drăm, năm truh tơring tơklah hơdrô̆, pơtruh thŏng ca nô iĕ vă 'nhăk tơmam drăm xa truh dôm tơring Tây Hòa, Phú Hòa, Đông Hòa. Khul jang Kuân khu 5 hlôi pơtruh hloh 100 ca nô păng gre đơ̆ng lơ pah. Kuân khu 5 hlôi chă dăr lăng cham gre păr Tuy Hòa vă vei sơđơ̆ng 'lơ̆ng ăn gre păr vơvêl pơtruh tơmam tơgŭm.

‘Mi tôch kơ tih đơ̆ng kơmăng ‘năr 15 truh ‘năr dơ̆ng ‘năr 20/11 hlôi pơm ăn đak lơ̆p tôch kơ dêh tơ̆ đak krong Ba, Kỳ Lộ, Bàn Thạch păng pơm ăn đak krong Srê Pốk tŏk hrĕnh, pơm ăn lơ̆p jrŭ păng tơklăh hơdrô̆ ưh kơ gơh chă năm vih vơ̆t tơ̆ păh Hơlĕch dêh char Đắk Lắk. Lơ̆m dêh char chih iŏk 33.630 tŏ hnam oei đei đak lơ̆p, hloh 11.500 ŭnh hnam đei tơklăh hơdrô̆ hloi, 11.242 ŭnh hnam măh yông tơklăh hăt hot. Ƀô̆ đô̆i vei lăng tơring sơlam, Kŏng an dêh char kŭm hăm khŭl lĭnh đơ̆ng Quân khu 5, Lĭnh đak dơsĭ tŏk bŏk pơih să dŏng tơgŭm, pơm hơnih gak roi tơbăt tơ̆ dôm hơnih krê hơmơt. Anih vei lăng kon pơlei dêh char hlôi tơgŭm hăt hot 30 ti hlak jên ăn kơ 60 xăh, phường vă tơlĕch jang tơ jră  păng hơmet pơ ‘lơ̆ng blŭng a.

Pơgê năr 20/11, Anih jang vei lăng kon pơlei dêh char Gia Lai hlôi hop akŏm tenh kuăng gah 'mi kial đak hơbông lip jrŭ tơ̆ tơring gah hơlĕch. Dang ei đei pơhlom  20.000 unh hnam kon pơlei ƀơm răm, jê̆ 11.000 'nu bơngai đei yông 'nhăk tenh kuăng.

Khul kŏng an, khul linh păng rim khul jang tơgŭm dŏng hlôi hơvơn hloh 5.000 kang ƀô̆, khul linh, 15 tŏ thŏng ca nô, 43 thŏng đei kơmăi păng kơhrĕng tơmam drăm kăl vă tơgŭm dŏng, vei sơđơ̆ng tơpôl. Mă lơ hnam trưng hŏk gah Hơlĕch dêh char ăn hŏk tro pơdơh hŏk păng đei 'măn pơm hơnih oei ăn kon pơlei đei pơtruh đơ̆ng hơnih đak lip oei xa.

‘Năr 20/11, dêh char Khánh Hòa pơtơm krao akŏm ƀatô, thŏng nan kơmăy chơ tơmoi chă tơmang lăng kơ kon pơlei vă bơ̆ jang dŏng tơgŭm ăn dôm tơring ưh gơ̆h yak vih vât yoa đơ̆ng đak lơ̆p. Khul jang kơpal klăih song lơ grŭp năm bơ̆ jang tơgŭm, vang jang hơdoi hăm linh đặc công tơ̆ đak, khul linh ƀô ƀô̆i păng kŏng an chơ kon pơlei lĕch đơ̆ng tơring krê hơmơt, atŭm hăm ‘nŏh chơ chuĕn tơmam xa, đak nhă, ao đông ăn rim unh hnam.

Kơdră vei lăng kon pơlei dêh char Trần Phong athei Anih vei lăng jang kơmăy, tĕch mơdro jăh mong akŏm mi tôm tơ̆ dôm siêu thị vă asong ăn kon pơlei, atŭm hăm ‘nŏh iŏk yoa pơđĭ ƀatô, thŏng nan kơmăy vă năm truh tơ̆ dôm tơring đak lơ̆p jrŭ.