VOV4.Bahnar - Đơ̆ng rŏng 4 sơnăm jang kiơ̆ tơdrong tơchơ̆t 522/2018 đơ̆ng Thủ tướng Tĕh đak, kĭ tơchơ̆t  Tơdrong vă jang Pơtho pơjing tơdrong jang păng pơchŏh trong ăn hŏk tro, bơ̆ jang pơchŏh trong ăn hŏk tro hŏk đang jăl ƀar hlôi đei hơyak hơ iă, adoi atŏk iŏk đei jơnei dôm tơdrong jang kơ rim hnam trương pơtho tơdrong jang păng hnam trương giáo dục thường xuyên, adoi atŏk ‘lơ̆ng ăn rơ̆ih tơmơ̆t hŏk jăl pêng. Mă lei, tơdrong ư̆h kơ măh hnam trương lăm hŏk pơtho tơdrong jang oei pơm ăn tơdrong pơchŏh trong ăn hŏk tro tơ̆ lơ dêh char lơ̆m tơring jang tim mă kĕ ‘lơ̆ng.

Vă jê̆ 300 ‘nu hŏk tro găh pơchŏh trong apĭnh hŏk tơ̆ Cao đẳng cộng đồng Đăk Nông sơnăm hŏk 2022-2023

Sơnăm au, măt bơngai hŏk tro lĕch ‘măng khoă lăm tơsĭn tơ̆ Dak Nông apĭng hŏk tơ̆ Hnam trương Cao đẳng cộng đồng Đăk Nông lơ hlŏh rim sơnăm. Hơdrô̆ lơ̆m ‘măng mă 1 hlôi đei vă jê̆ 300 ‘ju ŏh păng ‘măng mă ƀar gô krao tơmơ̆t 100 ‘nu ŏh dơ̆ng. Ƀok Nguyễn Hữu Lành, Kơdră chĕp pơgơ̆r Hnam trương tơbăt, jang kiơ̆ pơchŏh trong kiơ̆ tơdrong tơchơ̆t 522 sơnăm 2018 đơ̆ng Thủ tướng tĕh đak hlôi tơgŭm ăn hnam trương hơdrol măt bơngai hŏk tro vă krao tơmơ̆t hŏk păng trong krao tơmơ̆t hŏk, hơmet pơ ‘lơ̆ng tơmam drăm păng khŭl ƀok thây kô pơtho trŏ ƀlep, sơđơ̆ng ăn pơtho tơdrong jang ‘lơ̆ng hơ iă atŭm hăm pơtho hloi hŏk chư, tơgŭm ăn hŏk tro rơ̆ih kơ dĭh hŏk tơdrong jang. Ƀok Nguyễn Hữu Lành tơbăt:“Mơ̆t tơ̆ au mă kăl ‘nŏh đe ŏh hŏk tơdrong jang. Mă lei, đe ŏh jei gơ̆h rơ̆ih iŏk tơdrong hŏk chư dăh mă hŏk tơdrong jang. Tơdăh đe ŏh hŏk chư ‘nŏh, rim đe oh oei pơlong lĕch ‘măng khoă lăm jĭt ƀar nhen rim lăm hŏk anai đĕch. Găh hŏk dơ̆ng tơdrong jang ‘nŏh đe ŏh đei rơvơn vă hŏk kao đăng. ‘Nŏh jing hŏk 2 sơnăm, atŭm hăm hŏk tơdrong jang ‘noh 2 sơnăm 1 poăt ‘nŏh đe ŏh gơ̆h mơ̆t hŏk kao đăng dơ̆ng”.

Jei đei đe hŏk tro lĕch ‘măng khoă lăm tơsĭn tŏk lơ, sơnăm au dêh char Dak Lăk hlôi jang kiơ̆ pơchŏh trong hăm hlŏh 5.000 ‘nu ŏh. Lơ̆m au, 16 hnam trương pơtho tơdrong jang păng hŏk pơhram chư tơ̆ dêh char sơng tơmơ̆t đei 4.934 ‘nu hŏk tro. Kiơ̆ đơ̆ng ƀok Hà Ngọc Hướng, Kơdră chĕp pơgơ̆r Hnam trương giăo dục thường xuyên păng pơtho pơhrăm tơdrong jang apŭng Buôn Đôn, pơchŏh trong ăn hŏk tro hrei au hlôi yak hlŏh tơdrong tơnap tap ăn kơ đe hŏk tro păng ŭnh hnam đe hăp. Tơ̆ rim hnam trương giáo dục thường xuyên păng pơtho tơdrong jang, rim đe ŏh akŏm hŏk dôm tơdrong hŏk tơm, đei hŏk pơhrăm tơdrong jang hloi, tĕnh koăng băt tơdrong jang vă chă năm jang răh, pơm dă ƀiơ̆ tơnap tap ăn ŭnh hnam:“Nhen rim sơnăm, hăm bơngai ‘nŏh, năm hŏk jăl pêng, hŏk tro jĭt dôm môn ‘nŏh găh lơ đe hŏk tro hŏk ư̆h kơ kĕ. Dang ei hŏk tơ̆ hơnĭh au lăp hŏk 7 môn đĕch, mă ƀar ‘nŏh pơtho hơlen hlŏh kơna đe ŏh hŏk pơhrăm ‘lơ̆ng hơ iă ƀiơ̆. ‘Ngoăih kơ ‘nŏh, hŏk răh, jang răh kơna đe ŏh jei tơchă đei kon jên răt sa kơ ‘năr”.

Pơchŏh trong ăn hŏk tro hŏk đang jăl ƀar hlôi đei ƀô̆h hơdăh dôm tơdrong rơvơn hăm pơ đĭ hŏk tro păng rim hnam trương pơtho pơhrăm tơdrong jang păng pơtho pơhrăm hŏk chư, mă lei sơnăm hŏk 2022-2023, sơnăm mă puăn jang kiơ̆ tơdrong tơchơ̆t 522/2018 đơ̆ng Thủ tướng tĕh đak, tơ̆ Tây Nguyên ‘nao đei dêh char Lâm Đồng bơ̆ jang pơchoh trong hlŏh 25% măt bơngai hŏk tro lĕch ‘măng khoă jăl ƀar, pă dôm yơ ‘nŏh lăp đei đơ̆ng 10-20%. Tơdrong tơm pơm ăn ‘nŏh ưh kơmăh rim lăm hŏk pơtho tơdrong jang, ư̆h kơ hrơ̆p mĭnh ‘măng ƀar păh pơtho tơdrong jang păng pơtho hŏk chư. Nhen tơ̆ dêh char Dak Nông, đei Hnam trương Giáo dục thường xuyên apŭng pơtho tơdrong jang sơkâp mă lei ư̆h kơ đei pơtho hloi hŏk chư. Kiơ̆ đơ̆ng ƀok Nguyễn Văn Toàn, Kơdră chĕp pơgơ̆r Dơnŏ anĭh vei lăng hnam trương pơtho pơhrăm Dak Nông, kơ yuơ tơdrong ‘nao, trong hơmet ăn pơchoh trong 2.000 ‘nu hŏk tro lơ̆m sơnăm hŏk au, lăp jang keh đang lăp 1 poăt:“Tơ̆ tơring tơnap tap mă pơchŏh trong ‘nŏh hŏk tro ư̆h kơ đei rơvơn hŏk tơdrong jang, kơ yuơ truh hloi rim hơnĭh pơtho tơdrong jang jei jang tim gan ‘lơ̆ng. Kơ yuơ lơ lŏh kơna bơ̆n chă apĭng Dơnŏ anĭh vei lăng kon pơlei dêh char atŏk lơ hlŏh dơ̆ng vă krao tơmơ̆t pơ đĭ hŏk tro tơ̆ rim tơring tơnap tap hlŏh. Găh hăm tơring rơvơn ‘nŏh oei pơrô̆ athei krao tơmơ̆t ƀlep pơkăp, lăp pă 900 ‘nu hŏk tro đĕch”.

Hiơ hiơ̆ pơchŏh trong jei đei ƀô̆h tơ̆ Dak Lăk. Kiơ̆ đơ̆ng ƀok Phạm Đăng Khoa, Kơdră chĕp pơgơ̆r Dơnŏ anĭh vei lăng hnam trương pơtho pơhrăm Dak Lăk akhan, hơnĭh au tok bŏk hơdrin tơlĕch jang kơtang, mă kăl đơ̆ng sơnăm hŏk 2023-2024: “Pơchŏh trong ‘nŏh mĭnh lơ̆m dôm tơdrong jang tim mă ‘lơ̆ng hơ iă tơ̆ Dak Lăk. Nhen rim sơnăm ‘nŏh nhôn krao tơmơ̆t 80% hŏk tro lĕch ‘măng khoă jăl ƀar mơ̆t hŏk lăm 10, ‘nŏh sơnăm hŏk 2022-2023 nhôn hlôi tơjur pă 80%. Sơnăm đơ̆ng rŏng gô tơjur lăp pă 75%. 25% pă dôm yơ gô ba ăn hŏk tơdrong jang. Păng lơ lŏh vă sơđơ̆ng ăn trong tơlĕch jang pơchŏh trong đơ̆ng Khŭl kơdră Tĕh đak”.

Pơchŏh trong ăn hŏk tro đơ̆ng rŏng hŏk đang jăl ƀar ‘nŏh jing tơdrong tĭh kơ Tơdrong vă jang “pơtho pơhrăm lăng trŭh pơjing tơdrong jang păng pơchŏh trong ăn hŏk tro lơ̆m pơtho pơhrăm jăl jang 2018 - 2025”, đei kĭ tơchơ̆t kơ yuơ Tơdrong Tơchơ̆t kơsô̆ 522/QĐ-TTg năr 14/5/2018 đơ̆ng Thủ tướng Tĕh đak. Kiơ̆ tơdrong vă jang au, trŭh sơnăm 2025, rim tơring kăl pơchoh trong ăn tŏ sĕt hlŏh 40% ‘nu hŏk tro lĕch ‘măng khoă jăl ƀar, hăm tơring tơnap tap, măt bơngai vă pơchŏh trong tŏ sĕt hlŏh 30%. Mă lei, tơdrong ư̆h kơmăh lăm hŏk, ư̆h kơ tôm tong ƀar păh pơtho hŏk chư păng pơtho tơdrong jang tơ̆ lơ apŭng lơ̆m tơring Tây Nguyên, tŏk bŏk jing trong găn ga kơtang lơ̆m trong tơlĕch jang kiơ̆ Tơdrong vă jang au.  

Ƀai chĭh đơ̆ng: VOV Tây Nguyên

Tơblơ̆ nơ̆r: Amazưt