Đei tơdrong lăng ba tơmơ̆t jên jang đơ̆ng Đảng, atŭm hăm tơdrong hơdrin choh jang sa đơ̆ng kon pơlei, tơdrong hơrih sa kơ 326 ŭnh hnam oei lơ̆m pơlei tơnap tap hloh Klot, tơring Kon Gang, dêh char Gia Lai  tok bŏk roi năr roi tơplih ‘nao. Ŭnh hơyuh, trong, hnam pơgang roi năr roi ‘lơ̆ng liĕm, rơgoh ‘lơ̆ng. 100% ŭnh hnam hlôi đei ŭnh hơyuh hơdah ang rang ‘lơ̆ng; lơ ŭnh hnam hlôi răt đei gre kŏng nŏng, gre bơbĭt, tivi păng rim tơmam pơvih pơvăn ăn jang sa, hơrih sa. Ưh khan lăp tơplih găh pơlei pơla, trong choh jang sa kơ kon pơlei jei đei lơ tơplih hơ iă, bu bu jei hơdrin hŏk pơhrăm, jang kiơ̆ khoa hŏk kih thuơ̆t, rong kon tơrong păng tơplih ‘long pơtăm.Lơ ŭnh hnam hlôi pơtăm chehphe, sâu riêng, tiu păng rim ‘long sa plei, roi nar jang sa, hơrih sa roi sơđơ̆ng. Yă Ranh, Bí thư Chi bộ pơlei Klot, tơbăt jơhngơm đon chơt hơ iă tơ̆ hơnăp tơdrong tơplih pơlei pơla:“Dôm sơnăm ou kon pơlei đei tơplih lơ, kơ yuơ hrei ou kon pơlei hlôi băt chă pơtăm ‘long sa plei, pơtăm chehphe jang sa iŏk yua kơjăp. Ŭnh hnam ayơ jei đei ƀôh ƀiơ̆ gơnơm kơ đe sư băt pơtăm chehphe păng kơjă chehphe tŏk măt, kơ yuơ lơ loh kon pơlei dă ƀiơ̆ mơmat tat ƀiơ̆. Tơdrong ‘nou jei gơnơm đơ̆ng Teh đak tơgŭm djru kon pơlei.”

Tơ̆ xăh Đăk Sắk, dêh char Lâm Đồng, lơ jơhnơr bơngai M'nông, dôm bơngai lĭnh đei jơhngơ̆m đon 'lơ̆ng Ƀô̆ đô̆i Ƀok Hô hlôi đei iung tơblăh lơ̆m dôm khei sơnăm tơblăh vang tôch kơ mơmat tat. Hrei au, vih hơlơ̆k tơdrong hơrih sa hmă lơ̆m rơngei dôm lĭnh so lăng ƀôh pơlei pơla rim năr tơplih, tơdrong hơrih sa kon pơlei roi ‘năr roi phĭ tơnŏ, kơjăp ‘lơ̆ng. Ƀok Y Nhan (1959) Lĭnh so plei Đăk Mâm, xăh Đăk Sắk, dêh char Lâm Đồng tơbăt. “Dang ei tơdrong hơrih sa kơ kon pơlei lơ̆m pơlei 'lơ̆ng ƀiơ̆ kơ hơdrol sơ̆ tôch lơ. Teh đak, khul kơdră tơring kŭm bơngơ̆t truh, tơgŭm ăn tơdrong hơrih sa kơ linh so păng kon pơlei, mă loi jĭ dôm unh hnam dơnuh hin, unh hnam oei mơmat tat 'nŏh đei tơgŭm hnam oei, trong nơnăm, hnam trưng, hnam pơgang… Anih jang tơmam drăm dang ei đei tôm măh lơ ƀiơ̆ bơih.. Jang chĕh phe, tiu kŭm hiôk ƀiơ̆, kon pơlei đei dơ̆ng tơdrong 'lơ̆ng vă tưk tơiung mŭk drăm. Đe kon mon 'nŏh đei hŏk pơhrăm tôm, đei tơdrong 'lơ̆ng vă gơ̆h băt kơmăy kơmŏk, băt tơdrong hlôh vao 'nao. Jĭ bơngai hlôi yak hlŏh tơdrong tơblăh vang, lăng ƀôh pơlei pơla, teh đak hrei 'nâu tơplih thoi noh, nhôn chhôk ‘nă dêh. Tơdrong hơrih sa đei sơđơ̆ng, kon sâu đei hŏk pơhrăm, đei hơrih ‘lơ̆ng ƀiơ̆, 'nŏh jĭ tơdrong mă nhôn 'mĕh vă hlŏh.

Tơ̆ tơring Ia Hiao, dêh char Gia Lai dôm trong ‘nao tŏk bŏk lang să ưh khan lăp pơm tơplih pơlei pơla mă oei pơjing đei dơ̆ng rơvơn vă kon pơlei chă yơ yak, jang sa, mơdro sa rơvơn hloh. Đơ̆ng tơdrong lăp đon đơ̆ng kon pơlei, lơ jăl trong  hlôi đei pơih să ‘lơ̆ng liĕm; atŭm hăm ‘noh dôm tơdrong tơplih lơ̆m hơrih sa, hlôh vao vei lăng rơgoh cham char păng tơ iung pơjing pơlei pơla roi năr roi ƀôh hơdăh. Gơnơm tơdrong lăp đon đơ̆ng kon pơlei: 22 jăl trong tơ̆ 7 pơlei hlôi đei pơih să, lơ̆m ou đei lơ ŭnh hnam plang ăn teh, yuih hŭt dur pơgar vă pơm trong. Mĭnh jăl trong glung đơ̆ng tơring tơƀưh hăm Trong glung 25 găn hloh rim thôn Đoàn Kết, Điểm 9, Bôn Mi Hoan oei tơƀưh truh pơlei oei ‘nao 180 ŭnh hnam. Rim kon pơlei vang chă tơgop tŏ sĕt lơ̆m tơ iung pơjing pơlei pơla sơđơ̆ng dơ̆ng kơjăp, rơgoh ‘lơ̆ng. Ƀok Nay Jen, Cán bộ Mặt trận buôn Chư Plah Jai, tơring Ia Hiao, dêh char Gia Lai tơbăt: “Lơ̆m jơ ‘năr Quốc khánh 2/9, Khul bơ̆ jang Măt trân pơlei nhôn chă pơrô̆ hơvơn kon pơlei hơtol hla kơ Teh đak, jang kiơ̆ ‘lơ̆ng trong bơ̆ jang đơ̆ng Đảng, khôi luơ̆t teh đak. Nhôn jei hơgrop hloi pơrô̆ pơrôp ‘Măng iung jang “Pơđĭ kon pơlei vang vei lăng sơđơ̆ng Teh đak” hăm dôm trong jang tôch trŏ lăp vă kon pơlei vang jang kiơ̆. ‘Ngoăih kơ ‘noh, nhôn jei pơrô̆ pơtho khan ăn kon pơlei vei lăng năng tông rơgoh cham trong, tơ iung pơjing pơlei rơgoh ‘lơ̆ng, đơ̆ng rim ŭnh nam truh trong pơlei, koeng ƀôt”.

Jĭ 1 lơ̆m dôm tơring oei lơ mơmat tat kơ dêh char Lâm Đồng, xăh Đam Rông 4 đei kon pơlei kon kông đei hloh 90% kơsô̆ kon pơlei. 6 khei blŭng sơnăm 2026, tơring chih iŏk lơ jơnei ‘lơ̆ng lơ̆m hơtŏk tơiung mŭk drăm, joh ayŏ - tơpôl. Găh mŭk drăm choh jang sa hlôi hơtŏk tơiung hơgăt teh cheh phe tŏk truh 2.023 hek tar, sầu riêng 162 hek tar, ‘long mơ mur rong hơdrông 170 hek tar păng mắc ca 150 hek tar. Ưh kơ dơ̆ng lê̆ tơ̆ choh jang sa iĕ, tơring tŏk bŏk ƀrư̆ ƀrư̆ pơjing tơdrong choh jang sa ‘nao ‘moi kiơ̆ 2 trong jang hơdai tĕch sầu riêng, ca cao, hơdai hăm, pơjing jơnei 11 tơmam OCOP đei 3 hơnglŏng. Kơlih đơ̆ng tơdrong jang tŏk đơ̆ng choh jang âu hlôi kơtă dui tơjur kơsô̆ dơnuh hin lơ trong lơ̆m xăh, mă loi ‘noh jĭ lơ̆m kon pơlei kon kông, jur lăp oei pă 8,36%. Lơ̆m 6 khei hơtuch sơnăm, xăh Đam Rông 4 băt hơdăh tŭn pran dôm tơdrong jang pơjei băl tơklep hăm pơjing tơring tơrang ‘nao, khŏm hơtŏk ‘lơ̆ng tơdrong hơrih sa tơmam drăm păng jơhngơ̆m đon ăn kon pơlei lơ̆m tơring. Ƀok Lơ Mu Ha Poh, Phŏ Bí thư Đảng ủy xăh Đam Rông 4 (dêh char Lâm Đồng) tơbăt:“Xăh pơgơ̆r joh ayŏ kơdŏ soang, pơtôch Tơdrong jang đĭ đăng kon pơlei vei lăng sơđơ̆ng Teh đak sơnăm 2026. 'Ngoăih kơ 'nŏh, kŭm pơlung Mặt trận, khul grŭp tơpôl bơ̆jang kiơ̆ 'lơ̆ng tơdrong tơgoăt mĭnh jơhngơ̆m đon đĭ đăng hơdrĕch hơdrung, mă loi xăh Đam Rông 4 jĭ tơring đei lơ bơngai kon kông, đei lơ tơdrong lui khop…"

Cham gre păr apŭng plĕnh teh Liên Khương hlôi iung jang dơ̆ng đơ̆ng rŏng 5 khei tang ‘măng vă ming hơmet trong jur păr.Lơ̆m khei ‘năr blung iung jang, Cham gre păr apŭng plĕnh teh Liên Khương gô ăn jur păr lơ̆m mĭnh năr đơ̆ng 36-40 hơyuh, pơvih pơvăn ăn dang 6.800 ‘nu bơngai lơ̆m mĭnh năr. Tơdrong Cham gre păr apŭng plĕnh teh Liên Khương iung jang dơ̆ng gô tơgop pơih să hơnih truh, pơjing dơ̆ng jơhngơm pran vă Lâm Đồng atŏk tơ iung dôm tơdrong đei, rơvơn păng atŏk kơtang lơ̆m jăl atŏk tơ iung ‘nao. Lơ tơring kon kông lơ̆m dêh char tŏk bŏk tơplih kơtang choh jang sa pơm tơlĕch tơmam drămn, jang kiơ̆ kmăi kmŏk hơgei. Tơdrong rơvơn kiơ̆ tơring tŏk bŏk pơjing đei hơyak pran ‘nao ăn atok tơ iung mŭk drăm, pơm hơtŏk jang sa iŏk đei păng tơdrong hơrih sa kơ kon pơlei kon kông. ‘Nhong Liêng Hót The, Koeng kơphô̆ Bắc Tà Nung, phương Cam Ly- Đà Lạt, chơt hơ iă tơbăt: “Đơ̆ng rŏng hơgrop, ba ƀôh, pơlei pơla roi ‘lơ̆ng, roi năr roi tơplih. Ĭnh hơpơi đơ̆ng rŏng hơgrop, kon pơlei roi năr roi ‘lơ̆ng hloh dơ̆ng, kon pơlei tơplih đon tơchĕng, trong jang sa vă druh kiơ̆ tom teh đak păng rim teh đak, tơgop pơm ăn teh đak roi năr roi ‘lơ̆ng liĕm păng atŏk tơ iung hloh dơ̆ng.