Kiơ̆ Anih jang Kŏng thương dêh char Gia Lai, tơroi tơdrong kăl răt yua lơ̆m pơyan Têt Nguyên Đán Qúy Mão 2023 gô tŏk pơhlom 30%. Vă vei măh axong tơmam drăm, Anih jang hlôi pơkăl dôm anih jang mŭk drăm tơlĕch tơchơ̆t mong răk dôm tơmam drăm kăl, mă hăt noh tơmam pơnăn xa, pơm kiơ̆ jơnei tơdrong pơxơđơ̆ng kơjă tĕch, tĕch tơmam trŏ hăm kơjă pơkăp. Atŭm hăm noh, rim anih jang athei kĭ pơkăp vei xơđơ̆ng ‘lơ̆ng tơmam drăm, đei hoă đơn bơ̆ng pang tôm tong, đei tơm a hla chă hơdăh hloh. Yă Đào Thị Thu Nguyệt, Phŏ Kơdră Anih Kŏng thương Gia Lai tơroi: “Kơsô̆ tơmam drăm xơnăm âu kơchĕng gô đei truh 20.800 tih hlj, tơmam mong răk xơnăm âu noh xơđơ̆ng hloh. Anih jang Kŏng thương adoi tơlĕch dôm tơdrong pơkăp ăn dôm anih jang mŭk drăm vă mong răk tơmam drăm, vei măh mai ăn tơdrong tĕch răt păng hơvơn bưngai Việt Nam tơrĕk yua tơmam drăm Việt Nam vă tơlĕch dôm tơdrong kăl lơ̆m pơyan Têt. Tơmam mong răk vei măh ăn tơdrong kăl, ưh đei tơplih kơjă tŏk jur kư̆ kă lơ̆m pơyan Têt Nguyên Đán 2023 âu”.

Tơ̆ dêh char Đăk Lăk, tơring tĕch răt tơmam drăm ăh khei Têt Nguyên đán Quý Mão tŏk bŏk oei rơ-ông rơ-ang. Hăm 2 anih tĕch yo cha lơ̆m pơlei tơm Buôn Ma Thuột, pơmai Nguyễn Thị Nguyệt ăn tơbăt, ăh pơyan Têt, tơmam drăm tơlĕch tĕch lơ̆m tơring tŏk jê̆ 3 ‘măng, ăh ‘năr lơ noh pơhlom 7 tă minh năr. “Anih âu tĕch tơmam pơnăn xa đei pơhlom 40 truh 50 xơnăm kơ âu bơih, noh rim xơnăm nhôn bơ̆ tơmam Têt lơ hloh, tơmam drăm bơ̆ tơ̆ âu noh ‘nhĕm ‘nao ƀuh hloi, ưh đei iŏk ‘nhĕm ‘măn hơngeo ôh, iŏk hloi đơ̆ng anih đe ƀuh akŏm noh ‘nhĕm ‘lơ̆ng păng pai pơjing hloi. Dang ei găh tơdrong rơgoh ‘lơ̆ng noh kăp gĭt hloh, oei dôm tơmam drăm nai noh athei pơm kiơ̆ pơkăp đơ̆ng Anih tơm Y tê̆, đe xư pơkăp dôm yơ noh bơ̆ dôm ăi đĕch”

Anih pơm tơlĕch tơmam pơnăn xa Thành Phát, pơlei tơm Buôn Ma Thuột truh khei năr âu duh mong răk tôm tơmam drăm kăl. Kiơ̆ kơ yă Vũ Thị Gấm, kơdră anih jang tơroi, ăh khei Têt xơnăm âu, tơdrong kăl tơmam pơnăn xa tŏk pơhlom 20% pơtêng hăm ‘năr hmă. Vă vei xơđơ̆ng măh tơmam drăm, anih jang hlôi kơchăng chih măt iŏk tơmam đơ̆ng dôm anih pơm tơlĕch đơ̆ng pơlei tơm Hồ Chí Minh păng minh ƀar hơp tak xăh choh jang xa rơgoh ‘lơ̆ng lơ̆m dêh char Đăk Lăk: “Găh ƀanh kĕo âu to noh hlôi răt tơmơ̆t đei 90% bơih. Mă 2 noh dang ei tŏk bŏk ăh khei pơ-iŭ ƀum kơdĭm, bơ̆ dôm tơmam xa juăt jue ăh ‘năr Têt. Xơnăm mă yơ duh thoi ăi, kiơ̆ pơkăp hăm anih vei hơlen tơring tĕch răt, anih jang mŭk drăm răt tơmơ̆t tơmam drăm trŏ ƀlep hăm pơkăp tơm a hla chă hơdăh, đei pơtĕm tem hăm dôm tơmam răt đơ̆ng teh đak đe athei mă hơdăh hloh dơ̆ng vă vei xơđơ̆ng ‘lơ̆ng ăn tơmoi răt yua”

Vă vei xơđơ̆ng ‘lơ̆ng păng kơjă păh lăp tơmam drăm, hloh 1 khei kơ âu khul jang Vei hơlen tơring tĕch răt mă Anih tơm vei lăng tơring tĕch răt dêh char Đăk Lăk hlôi hơtŏk dôm tơdrong jang chă hơlen lăng. Atŭm hăm noh hơtŏk pran tơdrong tơroi tơbăt găh khôi lươ̆t teh đak păng kĭ pơkăp hăm dôm anih jang, tơ ‘ngla bơngai jang ưh đei mong răk, tĕch tơmam drăm yăh, tơmam ưh kơ băt tơm a hla chă. Ƀok Mai Mạnh Toàn, Kơdră Anih tơm vei lăng tơring tĕch răt dêh char Đăk Lăk ăn tơbăt: “Xơkơ̆t tơring tơm, tơmam drăm kăl, chih akŏm tơdrong jang hơdăh vă chă hơlen đei jơnei tơnăp, hơtŏk hơlen tơring tĕch răt păng xek tơlang dôm tơdrong pơm yoch hăm tơmam drăm kăl ‘măn ăn tơdrong răt yua kơ kon pơlei lơ̆m pơyan Têt”

Dêh char Đăk Lăk adoi pơjing akŏm đei 3 Khul jang hơlen găh rơgoh ‘lơ̆ng tơmam drăm xa, tơlĕch chă hơlen tơ̆ dôm anih pơm tơlĕch tĕch pơdro, răt tơmơ̆t tơmam drăm xa đơ̆ng teh đak, anih tĕch tơmam et xa kơtă, tĕch tơmam xa kiơ̆ trong kơphô̆ tơ̆ 7 apŭng, thĭ xăh păng pơlei tơm Buôn Ma Thuột. Ƀok Phạm Thế Hoan, Phŏ Kơdră Anih Choh jang xa păng Hơtŏk tơring pơxĕl ăn tơbăt: “Đơ̆ng chă hơlen noh ƀôh tôm unh hnam, anih jang păng tơ ‘ngla bơngai jang tĕch pơdro pơm kiơ̆ tơnăp dôm pơkăp đơ̆ng khôi lươ̆t găh pơkăp rơgoh ‘lơ̆ng tơmam drăm. Mă lei, đei minh ƀar anih pơm yoch noh nhôn xek tơlang kiơ̆ tơchơ̆t. Tơguăt hăm hơlen noh nhôn gô tơroi tơbăt găh khôi lươ̆t rơgoh tơmam drăm xa păng pơtho hăm dôm anih pơm tơlĕch tĕch răt athei vei rơgoh tơmam drăm xa kiơ̆ nhen tơchơ̆t tơlĕch”

Vă vei xơđơ̆ng kơjă tĕch răt lơ̆m tơring ƀơ̆t Têt Nguyên đán Quý Mão 2023, Anih vei lăng kon pơlei dêh char Đăk Lăk hlôi axong hloh 1.500 tih hlj vă mong tơmam drăm kăl. Dôm tơmam kăl akŏm xơđơ̆ng ăh jê̆ đĭ xơnăm 2022 păng Têt Nguyên đán Quý Mão 2023 đei: tơmam pơnăn xa (phe xŏng, phe ƀâu phu đei pơtăm yua lơ̆m teh đak), ‘nhĕm xa (‘nhĕm nhŭng, ‘nhĕm ier bip, kơtăp ier bip, rơmă, xĭk, ƀôk ngok păng dôm tơmam xa đei pơm tơlĕch đơ̆ng ‘nhot plei ‘long xa), tơmam drăm kăl nai. Khei năr pơxơđơ̆ng pơtơm đơ̆ng năr 30/11/2022 truh năr 30/2/2023.