VOV4.Bahnar  – Dôm năr âu, atŭm hăm jâ̆p teh đak, tơ̆ jâ̆p pơlei pơla lơ̆m tơring Tây Nguyên đei lơ tơdrong jang tơbăt 77 xơnăm Kăch mạng khei 8 păng Năr pơjing teh đak 2/9. Chơt hơ iă hăm dôm tơdrong đei jơnei ang hơdăh kơ teh đak, kon pơlei Tây Nguyên roi ƀlŏk tơbăt tơdrong plang ăn Ƀok Hô. Ƀok Y - Krưč Ayun (bơngai Ê Đê) tơ̆ pơlei Kna, xăh Čư Mgar, apŭng Čư̆ Mgar, dêh char Dak Lak ăn tơbăt: rim 'măng tơbăt năr  2/9 vih hơdơ̆r kơ khei năr Ƀok Hô đŏk tơbang tơchơ̆t rơngei hiôk hian. Hơyak kơ Têt rơngei hiôk hian, kon pơlei lơ̆m pơlei ưh hiơt jơhngơ̆m plang đơ̆ng Ƀok Hô, vă rim kon pơlei đei tơdrong erih phĭ tơtŏ, jơnap nhen hrei âu: “Kon pơlei hmach bơnê kơ Ƀok Hô, kơlih Ƀok hlôi pơgơ̆r kăch mạng. Đe liêt sih hlôi tơjră, lôch plang vă pơjei iŏk tơdrong rơngei ăn hơdrung hơdrĕch, hơ 'nhăk tơdrong rơngei ăn kon pơlei. Kon pơlei ƀlŏk hơdơ̆r kơ Ƀok Hô tam mă tom hơ iă atŭm hăm kon pơlei noh hlôi vih hăm yă ƀok dơnơm bơih. Roi ƀlŏk hơdơ̆r kơ Ƀok, nhôn kơ 'nôh pơm jang. Tơ̆ yơ duh ƀenh kơ tơdrong chơt hơ iă lơ̆m rơngei hiôk hian, pă đei oei tơblăh tơblŭng jĭ bơnôh bơih”

Yă Y Nhít, 68 sơnăm, oei tơ̆ pơlei Tu Mrông, tơring Tu Mrông, apŭng Tu Mrông, dêh char Kon Tum tơbăt, đơ̆ng ‘lơ̆p yă kơtơ̆ng kră pơlei păng đe kră tơroi găh Ƀok Hô. ‘Măng mă blŭng yă oei ngêh Ƀok Hô ‘nŏh bơnbgai yang mơsêh nhen lĕ lơ̆m tơdrong tơroi kră sơ̆ kơ bơngai Xơ Đăng. Trŭh ‘lŏ đei tơ ƀơ̆p khŭl ƀô̆ đô̆i, yă mă băt hơdăh găh Ƀok Hô păng sa roi yom kiơ̆ kơtang hlŏh dơ̆ng. Năr Kuô̆k Khanh năr 2/9 kơtơ̆ng Ƀok Hô đŏk Nơ̆r Tơchơ̆t Tĕh đak pơm tơm kơ dĭh lơ̆m brŏ, yă Y Nhít mơ̆ng măh chhưu lơ̆m jơhngơ̆m:“Lơ̆m oei ‘lơ̆p, ĭnh kơtơ̆ng đe kră lơ̆m pơlei tơroi tôch kơ lơ găh Ƀok Hô, bui bu jei ‘Mêm kơ eng kơ Ƀok Hô ngăl. Lơm mă ĭnh pơm Ƀô̆ đô̆i, ĭnh ƀô̆h rim bơngai lơ̆m khŭl ƀô̆ đô̆i nhôn bu bu jei nhơ̆m ngăl, ƀô̆h lơ lŏh ĭnh apĭng “Iĕm nhơ̆m kă kiơ nơ?” - Đe sư tơl - “ ‘Nhơ̆m ‘mêm mơnat kơ Ƀok Hô hiong. Pơ đĭ kon pơlei lơ̆m tĕh đak bu bu jei nhơ̆m gơ̆h sơ ‘ngon ‘mêm kơ eng kơ Ƀok, kơ yuơ Ƀok ‘nŏh Kơdră chĕp pơgơ̆r gơ̆h hơgei hlŏh kơ hơdrĕch hơdrung. Ba hơnơ̆ng ƀlŏk hơdơ̆r năr rơnĕh păng năr hiong kơ Ƀok Hô. Lơ̆m dôm năr au, ĭnh ƀlŏk hơdơ̆r ‘mêm kơ eng kơ Ƀok Hô tôch bach, gơnơm đei Ƀok kơna Tĕh đak bơ̆n mă đei rơngei, pơm tơm kơ dĭh nhen hrei au, păng gơnơm tơdrong lăng ba kơ jăp đơ̆ng Đảng, Tĕh đak, tơdrong erĭh sa kơ kobn pơlei hrei au mă tơplĭh ‘nao, phĭ tơtyŏ dơnŏ ‘lơ̆ng. Rim sơnăm, kư̆ mă truh năr 2/9 tơring jei pơgơ̆r tơ̆ rông vă ƀlŏk hơdơ̆r năr hiong răm kơ bơngai Kơdră chĕp pơgơ̆r ‘mêm kơ eng, bu bu jei ‘mêm kơ eng kơ Ƀok Ho ngăl”.

Atŭm hăm đon ƀrơ̆k, ƀlŏk hơdơ̆r kơ Ƀok Hô ƀơ̆t tơbăt Năr pơjing teh đak năr 2/9, pơmai Đinh Hman (bơngai BaNa) tơ̆ pơlei  HVat, xăh Ayun, apŭng Chư Sê, dêh char Gia Lai tơroi: “Ƀok Hô jing minh 'nu bơngai nuih mơng tih tên. Ƀok đŏk tơbang tơchơ̆t pơjing teh đak Việt Nam, hơ 'nhăk đei tơdrong hiôk hian, phĭ tơtŏ, dơnŏ 'lơ̆ng ăn rim bơngai. Rim kon pơlei kŭp yom, ƀlŏk bơnê kơ tơdrong plang đơ̆ng Ƀok Hô. Hơnơ̆ng vei tơnăp nơ̆r Ƀok Hô pơtho, kon pơlei Jarai, Bahnar păng kon pơlei Kinh tơguăt tơguăl minh bơnôh, atŭm băl pơjing pơlei pơla tơplih 'nao, pơjing tơdrong erih phĭ tơtŏ, ưh đei tơklăh đơ̆ng dôm hơdrung bơngai”

Ƀlep lơ̆m năr lêh Kuô̆k Khănh năr 2/9 sơnăm au, Thị Lan (hơdrung M’Nông), oei tơ̆ bon Đăk Kliêng, tơring Quảng Tín, apŭng Đăk Rlấp, dêh char Đắk Nông, sa roi chơt hơ iă hlŏh dơ̆ng mư̆h ŏh hlôi kơtĕch khei ‘năr pơhrăm bơ̆ jang đei tơmơ̆t jang hloi lơ̆m Dơnŏ anĭh vei lăng kon pơlei tơring Quảng Tâm. Thị Lan tơroi, gơnơm đei Đảng, đei Ƀok Hô, tĕh đak bơ̆n hlôi đei tơdrong erĭh sa hiôk hian, sơđơ̆ng, đe hơ iŏh tơ rim pơlei pơla đei hŏk pơhrăm tôm. Hơdrô̆ ŏh ‘nŏh chơt hơ iă hlŏh đei hok đăi hŏk luơ̆t, brŏk vĭh tơ̆ Đắk Nông đei pơjao tơdrong jang trŏ ƀlep, vă gơ̆h tơgop tơgŭm ăn kon pơlei, tơ iung pơjing erĭh sa roi năr roi atŏk tơ iung. Thị Lan pơma: “Tơdrong erĭh sa kơ kon pơlei hrei au sơđơ̆ng hiôk hian bơih, băt jang kiơ̆ khoa hŏk kih thuơ̆t lơ̆m chŏh jang sa, lơ̆m pơkong jei hŭt ƀiơ̆ mĭnh ƀar tơdrong pă gan ƀlep hăm tơdrong erĭh sa hrei au. Kon pơlei jei pơtho tơbăt ăn kôn mon kon hơ ‘lơ̆p vei răk tơdrong oei sa ‘lơ̆ng hơ iă sơ̆ ki nhen tơdrong hơri, tôn chĭng chêng, tanh brong jak, tanh brai ... dôm tơdrong oei sa ‘lơ̆ng rŏ kơ kon pơlei M’nông kon pơlei jei hơnơ̆ng vei răk tơ ƀăk mong ‘lơ̆ng liĕm ăn jơhnơr đơ̆ng rŏng”.

Tơblơ̆ nơ̆r: Lan - Amazưt