VOV4.Bahnar – Đơ̆ng rŏng đunh khei năr hăt hot, truh dang ei tơdrong tĕch răt teh tơ̆ Đăk Lăk hlôi tơjur mă lei hlôi pơm lơ tơdrong ưh kơ ‘lơ̆ng. Tơ̆ minh ƀar tơring tĕch lơ teh, lơ unh hnam kon kông ƀôh kơdih po hiong đĭ anih oei đơ̆ng rŏng kơ tĕch minh hơgăt teh ăn bơngai răt kơdih năm bơ̆ hla bar pơkăp yua teh. Lơ unh hnam ưh kơ băt hơdăh hla bar pơkăp yua teh dang ei tơ̆ yơ, hơgăt teh mă kơdih po đei hơnăn dăh mă ưh đơ̆ng rŏng kơ tĕch tơlĕch minh hơgăt teh. Đei dôm tơdrong ăn ƀôh iŏk tơdrong ưh kơ hlôh vao đơ̆ng kon pơlei duh nhen dôm tơdrong tơjruh lơ̆m pơkăp tĕch răt teh, mă hăt noh tơ̆ tơring kon kông, tơring ataih yaih, vă chă pơhlŭ pơhlôm pơjĭp.

Unh hnam yă H’Bluên Niê, tơ̆ pơlei Sút H’luốt, xăh Cư Suê, apŭng Cư M’gar đei 3 sao teh, đei axong 400m2 teh bơ̆ hnam păng hlôi man hnam oei tơ̆ hơgăt teh âu. Đunh kơ âu hloh 1 xơnăm, kơjă teh tŏk kăp, unh hnam yă H’ Bluên tĕch hê̆ 1 sao (lơ̆m noh đei 240m2 teh bơ̆ hnam (thôh kư)) hăm kơjă 590 trĭu hlj ăn minh ‘nu tơ̆ pơlei tơm Buôn Ma Thuột. Kơyuơ ưh kơ băt hơdăh găh pơkăp khôi luơ̆t noh yă hlôi pơjao hla bar ăn bơngai răt năm bơ̆ hla bar vă tơklăh hơnăn teh tĕch.

Mă lei, đơ̆ng rŏng kơ keh đang, bơngai răt pơdreo ƀia đỏ noh unh hnam yă pơtơm băt pă đei oei vă minh met teh pơkăp bơ̆ hnam. Blĕk kơ đon, yă H’ Bluên ưh kơ iŏk hla bar pơkăp yua teh păng athei bơngai răt kla tôm hơgăt teh 160m2 kơ yă nhen hlôi pơkăp adrol: “ ‘Năr noh xơ̆ đe xư pơdreo hla bar pơkăp yua teh ăn kơ inh lăng, inh ưh kơ ƀôh đei teh pơkăp bơ̆ hnam nhen hla bar xo, inh akhan ưh kơ vă iŏk. Đe xư akhan ưh đei teh thôh kư noh ih hăm iŏk jên ưh, inh akhan ưh kơ iŏk jên, iŏk teh thôh kư nhen hla bar pơkăp adrol ki”

Duh nhen thoi noh, unh hnam yă H’Luyên Niê, pơlei Sút H’luốt, xăh Cư Suê hlôi tĕch 900m2 teh (lơ̆m noh đei 300m2 thôh kư) ăn minh ‘nu tơ̆ pơlei tơm Buôn Ma Thuột păng pơjao ƀia đỏ ăn bơngai âu năm bơ̆ hla bar pơkăp. Mă lei jê̆ 2 xơnăm kơ âu, bơngai răt teh duh tam mă pơdreo ƀia đỏ, unh hnam yă H’Luyên pơngơ̆t kơ đon, ưh kơ băt bơngai răt teh hlôi pơm kiơ hăm ƀai đỏ teh po: “Tôm  400m2 thôh kư, đe xư răt 300m2 thôh kư, inh oei 100m2 thôh kư. Năm kĭ tơ̆ kŏng ti jang găh teh tơ̆ to mă 2 xơnăm minh puơ̆t tam mă ƀôh hla bar tơ̆ yơ, dang ei oei pơngơ̆t kơ đon, jĭ kơ̆l hăm tơdrong âu. Đe xư bơ̆ hal bar pơkăp noh đe xư iŏk đĭ bơih, oei hla bar đe xư akhan mơng vă năm bơ̆ hla bar pơkăp mă truh dang ei tam mă ƀôh pơdreo”

Yă H’Đàn Niê, Kơdră pơlei Sút H’luốt ăn tơbăt, đơ̆ng chă hơlen băt hơdăh lơ̆m pơlei đei lơ bơngai tĕch teh mă lei hiong đĭ teh thôh kư. Pơlei tŏk bŏk oei hơvơn rim unh hnam tơroi tơbăt vă pơtruh ăn jơnŭm pơgơ̆r tơring. Kiơ̆ kơ yă H’Đàn, mă tơm dôm unh hnam kon pơlei adoi ưh kơ băt hơdăh găh khôi luơ̆t duh nhen hla bar tĕch răt teh, kon pơlei adrô̆ băt kĭ hơnăn păng pơkăp mă ưh kơ băt tơdrong tơm pơkăp dih băl thoi yơ noh ƀônh ƀơm đe pơhlŭ: “Tơdrong âu tơpă tơnap tap ăn kon pơlei, pă đei oei teh. Hnam noh đei man đơ̆ng adrol, adrol kơ tĕch teh noh đei teh pơkăp bơ̆ hnam, oei dang ei nhen lĕ bơ̆ hnam tơ̆ teh choh pơtăm bơih. Đei minh ƀar bơngai noh jê̆ 2 xơnăm kơ âu mă tam ƀôh pơdreo ƀia đỏ. Lăng atŭm kơyuơ hlôh vao tam mă kloh klĕch đơ̆ng kon pơlei, ưh kơ băt găh luơ̆t teh, pơkăp đơ̆ng đe chih thoi âu thoi to mă minh ƀar bơngai ưh kơ băt chư, kơtơ̆ng akhan găh răt athei kĭ noh kĭ đĕch”

Ƀok Nguyễn Công Văn, Phŏ Kơdră Anih vei lăng kon pơlei apŭng Cư M’gar ăn tơbăt, apŭng tŏk bŏk pơkăl dôm xăh, thĭ trâ̆n chă akŏm chih tơmơ̆t tơroi tơbăt, atŭm hăm noh pơgơ̆r dôm anih juăt jang chă hơlen lăng, pơm hơdăh mưh đei tơdrong pơhlŭ dăh mă ưh. Găh dôm anih jang kơpal, mưh đei tơdrong pơm glăi, kơnê̆, tơgŭm ăn tơdrong tơklăh teh thôh kư đơ̆ng kon pơlei, apŭng gô xek tơlang dăh mă tơroi hăm anih jang kơpal xek tơlang trŏ kiơ̆ khôi luơ̆t tơchơ̆t: “Nhôn gô pơtoi pơgơ̆r anih vei xơđơ̆ng tơpôl duh nhen anih vei lăng kon pơlei dôm xăh, thĭ trâ̆n băt hơdăh tơdrong đei ƀôh tơ̆ tơring, hơlen hơdăh rim tơdrong, kiơ̆ đơ̆ng noh tơroi hăm anih vei lăng kon pơlei apŭng hơlen,x ek tơlang trŏ nhen pơkăp. Mưh đei tơdrong pơhlŭ đơ̆ng tơdrong ƀônh lui kơđe đơ̆ng kon pơlei vă chă pơm tơdrong kơnê̆, đei ƀôh tơdrong pơm glăi noh tơpă mưh đei tôm bơ̆ng pang đơ̆ng chă hơlen noh athei xek tơlang hloi ưh đei lê̆ đunh tơdrong đei ƀôh âu”

Đơ̆ng rŏng hăt hot tĕch teh, lơ unh hnam tơ̆ xăh Cư Suê pơma adrô̆, tơ̆ dêh char Đăk Lăk pơma atŭm tŏk bŏk ưh đei xơđơ̆ng kơlih ưh kơ băt hơdăh bơngai răt teh pơm thoi yơ mă iŏk pơđĭ thôh kư kơ po. Lơ̆m kơplăh noh, lơ unh hnam ưh kơ băt ƀia đỏ teh pơjao ăn bơngai răt dang ei oei ƀơ̆t yơ, hơgăt teh oei đei hơnăn po dăh mă hlôi chih hơnăn đe, pơkơ̆ng âu to. Kon pơlei ƀơm pơhlŭ hơlenh, mă ưh kơ băt kiơ, păng duh ưh kơ băt pơm thoi yơ vă vei vêr tơdrong pơyua ăn kơdih po.

Lan chih păng pơre nơ̆r