Tơdrong vă jang trong gre rĕnh Quy Nhơn - Pleiku hơtăih kơjung 125km, yak hloh 16 tơring, phương, đei ming man să 4 trong gre kơdou ting ring, hăm ăn kơdou rĕnh 100 km lơ̆m 1 jơ, hăm akŏp kon jên tơmơ̆t jang vă jê̆ 44.000 ti hlak jên. ‘Nou hơnih ming man đei kơdră păng kon pơlei dêh char Gia Lai hơmŏ kơtang gô pơjing đei hơyak pran hơmet pơ ‘lơ̆ng trong nơnăm, pơtrŭt kơtang mơdro sa păng atŏk tơ iung muk drăm-tơpôl tơring. Gơnơm tơdrong kăl ou, lơ̆m khei ‘năr tơlĕch jang hlôi sơng iŏk đei kon pơlei lăp đon. Lơ ŭnh hnam đei teh gah hơgăt teh iŏk tơvih hlôi iung jang hơdoi ‘lơ̆ng, hrôih pơjao ăn teh vă tơdrong vă jang đei iung jang sơđơ̆ng. Kơdră rim tơring, phương đei trong gre rĕnh Quy Nhơn - Pleiku găn hloh jei tŏk bŏk kơrŭn tơlech jang iŏk tơvih teh vă hrôih pơjao ăn hơnih ming man.  Vă tơlĕch jang Tơdrong vă jang trong gre rĕnh Quy Nhơn - Pleiku kăl iŏk tơvih teh hloh 942 ha, hăm kon jên hrŭ ăn, tơgŭm djru dang hloh 4.700 ti hlak jên.