Hăm kon pơlei kon kông, Têt Rơngei ưh hơdrô̆ jing 'măng vă tơƀlŏk gah tơdrong juăt jue, pôk bơnê hăm đe mih ma duch nă, mă oei jing trong vă tơguăt tơguăl, hơtŏk tơ-iung pơlei pơla. Tơ̆ hơnih gru grua kơ jơhnơr hơrih teh đak Groi 722 – Đăk Săk, dêh char Lâm Đồng, lơ̆m dôm năr khei 8 tơƀlŏk dơ̆ng kơ dôm tơdrong tơblah krưp kơ khul linh păng kon pơlei tơ̆ tơring lơ̆m dôm sơnăm 1965 - 1975, mă hăt noh Tơdrong tơblah Đức Lập ah pơyan hla ruih sơnăm 1968.

Hăm ƀok Y Dơi, linh so bơngai M’nông, oei tơ̆ pơlei Đăk Săk, oei hơdơ̆r hơdah gah tơdrong tơblah ou: “Inh năm pơm bộ đội đơ̆ng sơnăm 18. Lơ̆m rim 'măng tơblah hăm Mi, nhôn oei lơ̆m bri tơ̆ Đắk Prí, Nâm Nung, phơ phŏ kơdou truh Campuchia. Dang ei oei hơrih, đei sơng năr Quốc khánh, lăng pơlei pơla tơplih 'lơ̆ng, kon sou đei tơdrong hơrih 'lơ̆ng hloh, inh chơt hơ-iă dêh. Inh đei Hơnih tơm vei lăng Khul linh man ăn hnam oei ou, rim khei đei tơgŭm ăn 6 - 7 triu hlj, khul grŭp inh lôch đĭ ưh đei ƀôh năr đei iŏk jơnei. Hơrih lơ̆m tơdrong rơngei hiôk hian, inh roi tơgĭt păng ƀlŏk hơdơ̆r kơ bôl buăl hlôi lôch plang”

Đơ̆ng dôm tơdrong chơt hơiă kơ năr Quốc khánh, kon pơlei dôm hơdrĕch kon kông Tây Nguyên roi ƀôh hơdăh dôm tơdrong tơplih ‘nao lơ̆m tơdrong arih xa. Tơ̆ xăh Ia Tul, dêh char Gia Lai, lơ tơdrong jang ming man oei đei tơlĕch nhen pơm trong gre tơƀưh đơ̆ng Trong 25 mât tơ̆ xăh, man anih pơtruh đak yoa rơgŏh tơ̆ plei Biah A, man trong bê tông xi măng lĕch tơ̆ chŭn mir kơ plei Tơ Khế. Dôm hơbong pơro đak, kơmăi ƀôm, raih nang tơ̆ dôm pơlei Tơ Khế, Bôn Biah A, Bôn Biah B kŭm đei tơlĕch jên man, vang tơgop găn ƀiơ̆ đak lơ̆p, pơyoa ăn tơdrong choh jang xa.

Ƀok Nay Hao, bơngai đei kon pơlei lui yom tơ̆ plei Jư̆, xăh Ia Tul, pơma găh tơdrong gĭt kăl đơ̆ng năr Quốc khánh:  "Năr Quốc khánh 2/9, năr Ƀok Hô pơre nơ̆r Tơbăt Rơngei hiôk hian, ‘nâu hơnơ̆ng jĭ năr lêh tih, gĭt kăl kơ hơdrĕch hơdrung bơ̆n. Đei rơngei hiôk hian ‘nŏh mă gơ̆h đei tơdrong arih xa huiôk chơt, phĭ tơtŏ dơnŏ ‘lơ̆ng nhen hrei ‘nâu. Inh ƀôh teh đak bơ̆n oei jang tŏk tôch pran, pơih xă tơdrong jang xa hơdai hăm apŭng plenh teh. Dôm sơnăm tơjê̆ âu, gơnơm đei lơ tơdrong tơgŭm trŏ ƀlep, tơdrong mât 1 ƀơ̆r đon lơ̆m tơpôl, pơvei băl roi ‘lơ̆ng. Kon pơlei tơ̆ âu bu bu kŭm 1 jơhngâm kiơ̆ Đảng, vang jang xa atŏk tơiung mŭk drăm vă pơjing pơlei pơla roi pơdrŏng ‘lơ̆ng rŏ."

Tơ̆ thôn Kdăng, xah Nuih mơng Kdang, dêh char Gia Lai, tơring đei hloh 256 unh hnam kon pơlei Bahnar, tơdrong sơng năr Kuô̆k khănh chơt hơ-iă dêh. Hla kơ Teh đak đei hơtol ah hơnăp kơ rim unh hnam. Kon pơlei pơgơ̆r tơplŏng kơdou, pơjing đei tơdrong sô̆ hơ-iă, tơguăt tơguăl lơ̆m pơlei pơla.

Ƀok Xuin, oei tơ̆ pơlei Kdăng tơroi: “Lêh năr 2/9, unh hnam păng lơ̆m pơlei adoi hơtol hla kơ teh đak, chă pơtơm et xa sô̆ năr Kuô̆k khănh. Hơdrol kơ lêh, rim unh hnam chă tơra tŏ sĕt kon jên vă răt bơ̆n nhŭng păng tơdrô vă atŭm et xa năr lêh tih ou, et xa sô̆ mă lei adoi oei vei sơđơ̆ng 'lơ̆ng păng tơguăt tơpôl pơlei pơla. Sơnăm ou thôn pơgơ̆r đă ƀơlŏng kơtă tơ̆ pơlei hăm khul ƀơlŏng tơdăm păng đe hơ-ioh sô̆ chơt tơpă, chơt hơ-iă ăn đe kôn mon kon sou năm hŏk pơhrăm đơ̆ng rŏng kơ dôm năr lêh têt”.