Jơ hŏk nơ̆r Anh tơ̆ lăm 11A4 kơ ƀok thây Phan Mạnh Tiến hơnơ̆ng đei tơdrong hưch hanh. Ƀai hŏk đei hơdai hăm tơdrong pơm ngôi, pơma nuh, pơn băl tôch hơiă… Oh Trần Tú Tài, lăm 11A4 ăn tơbăt, đơ̆ng năm hŏk tơ̆ Hnam trưng THPT Thực hành Cao Nguyên, inh pơtơm truh hăm dôm jơ hŏk nơ̆r Anh tôch hơiă thoi âu, tơgŭm ăn ŏh hŏk ƀônh gơ̆h ƀiơ̆: “Ƀai hŏk thây hơmet tôch rơđăh păng tôch lăp vă tơgŭm ăn nhôn băt hơdăh rim ƀai hŏk. Đơ̆ng rŏng kơ ‘nŏh ƀok thây đei ƀai pơtho ming dơ̆ng, tơgŭm ăn oh roi hlôh vao păng ƀok thây hơnơ̆ng yak hơdoi, hơlen năng ƀai, hơmet ming ƀai ăn oh vă oh roi hlôh vao, hŏk roi gơ̆h lơ̆m rim năr”.

Ƀât mă đe oh hŏk tro THPT tôch hưch hanh hăm jơ hŏk nơ̆r Anh kơ ƀok thây Phan Mạnh Tiến yoa tơgŭm ăn đe oh da ƀiơ̆ gleh hrat mưh hŏk, hŏk iŏk đei lơ tơdrong hơiă, ‘nŏh đe sinh viên Đại học Tây Nguyên vang pơtâp tơ̆ âu, nhen ƀôh tơdrong ‘nao lơ̆m tơdrong jang kơdih. Boăl Phạm Thị Thu Hà, sinh viên khoa Nơ̆r teh đak đe, Đại học Tây Nguyên, tơroi: “Oh hŏk đei dơ̆ng lơ tơdrong kăl đơ̆ng ƀok thây vă ning mônh kơnh gơ̆h tơmât yoa lơ̆m tơdrong pơtho hŏk.”

Hăm hŏk tro tơ̆ Hnam trưng THPT Thực hành Cao Nguyên, ƀok thây Tiến ưh lăp bơngai pơtho đĕch mă oei jing bơngai băt chă mơ̆ng, đei lơ nơ̆r pơlung tôch hơiă hai. Lơ hŏk tro truh hăm thây nhen thoi 1 ‘nu bơngai ‘nhŏng vă pơma nuh, iŏk đei nơ̆r pơtho tơƀôh lơ̆m sơnăm oei đei lơ tơdrong tơplih lơ̆m jơhngâm. Oh Lê Sỹ Trọng, lăm 11A5 ƀlŏk dơ̆ng jơnăr vang truh hăm tơdrong thi iung jang xa gơ̆h hơgei: “Ƀok thây Tiến jĭ bơngai năm hơdoi hăm nhôn, tơgŭm ăn nhôn tôch pơneh lơ̆m tơdrong jang Rong iĕr hơchăng lơ̆m pơgar ‘long pơgang. Ƀok thây adrin lơ̆m rim tơdrong, pơtho ăn nhôn chă hơlen năng, pơlung jơhngâm ăn rim bơngai. Đơ̆ng rŏng 1 khei ‘năr bơ̆ jang kiơ̆ ƀok thây pơtho păng jang đei ‘lơ̆ng, ‘nâu jĭ tơdrong mă kơdih kâu jang đei blŭng a kơna tôch hưch hanh, jang đei nhen thoi noh oh ƀôh tôch hơiă”.

Hơdai hăm pơtho chư, ƀok thây Phan Mạnh Tiến oei pơm Bí thư Đoàn hnam trưng hai, thây bơ̆jang tôch tơnăp. Hlŏh 10 sơnăm bơ̆ jang tơ̆ hnam trưng, thây tơlĕch lơ tơdrong jang tơgŭm lơ̆m păng ‘ngoăih kơ hnam trưng. Nhen lơ̆m khei ‘năr đei jĭ COVID-19 pơm ăn tơdrong hŏk trư̆k tuyê̆n tôch trăp trĭn, thây roi tơƀôh pơgơ̆r thi chih báo tường lơ̆m kơmăy điên tư hăm nơ̆r Anh “Năr chŭr măih”, sơng đei lơ thây kô lơ̆m păng ‘ngoăih kơ teh đak vang thi. Lơ tơdrong jang tơgŭm đơ̆ng thây tơlĕch nhen “Têt ‘mêm mơnat”, “Tơgŭm pơyan thi”, “Tơ̆k hơdăh đon bơnê”, “Trong yak năm tơ̆ anih ƀrê”, bơ̆ jang tơgŭm ăn tơring sơlam… hlôi hơpăh kơhrĕng kơsuơ̆t jên hŏk ƀŏng, tơgŭm ăn lơ hŏk tro pơmat tat păng roi tơƀôh lơ đoàn viên rơgei ăn Đảng.

Ƀok Nguyễn Tiến Chương, Phŏ hiê̆u trơng Hnam trưng THPT Thực hành Cao Nguyên akhan: “Thây Tiến jĭ 1 ‘nu ƀok thây oei mơlôh tôch hơbĕch hơbal găh tơdrong jang khul kŭm nhen găh pơtho chư, hơnhăk tơdrong jang đoan pơma hơdrô̆ păng tơdrong jang druh dăm hŏk tro, sinh viên pơma atŭm tôch đei yoa. Thây oei hơtŏk tơdrong iŏk yoa AI mưh pơtho hŏk; vei kơjăp câu lạc bộ nơ̆r Anh, pơgơ̆r thi Gơgŭ teng neng măih lơ̆m hnam trưng, hơnhăk ba trong hŏk nơ̆r Anh ‘nao, hŏk năm hơdoi hăm pơhrăm pơma, pơm ăn đe oh ƀôh hưch hanh hăm jơ hŏk nơ̆r Anh.”

Dôm tơdrong adrin ưh đei pơdơ̆h đơ̆ng ƀok thây oei mơlôh Phan Mạnh Tiến hlôi đei hnam trưng năng tôch tơgăl. Sơnăm 2023, thây iŏk đei yaih Nhi đe thây kô pơtho rơgei lơ̆m dêh char. Sơnăm 2024, thây đei Trung ương Đoàn pôk pơ ư jĭ ƀok thây oei mơlôh rơgei lơ̆m teh đak păng jing 1 lơ̆m dôm ‘nu bơngai rơgei đei pôk pơ ư tơ̆ Hop akŏm “Druh dăm sơnăm mơlôh rơgei jang kiơ̆ nơ̆r Ƀok Hô” ‘măng mă VIII sơnăm 2025. Tơdrong pơcheh “Hơtŏk nơ̆r Anh hăm AI” đơ̆ng ƀok thây iŏk đei yaih A tơ̆ hnam trưng păng yaih C tơ̆ Anih vei lăng pơtho pơhrăm dêh char, đei năng jĭ trong pơtho tôch lăp hăm chăl oei tơplih hăm kơmăy sô̆ lơ̆m tơdrong pơtho pơhrăm.

Pơma găh trong vă jang tơ̆ hơnăp kơnh, ƀok thây Phan Mạnh Tiến ăn tơbăt: “Ba athei tơplih ‘nao trong pơtho hŏk, pơm thoi yơ vă gơ̆h đei lơ tơdrong sơng đei hŏk tro vang akŏm păng đei yoa ‘lơ̆ng. Hŏk iŏk lơ trong jang vă gơ̆h đei dôm tơdrong jang mă đe oh ‘mĕh druh kiơ̆, ba athei adrin tơlĕch trong jang mă lơ. Adrin tôch pơneh vă pơjing đei dôm câu lạc bộ tơ̆ Hnam trưng, tưk tơiung dơ̆ng lơ câu lạc bộ nơ̆r Anh, pơhrăm pơma nuh hăm băl, câu lạc bộ trong arih xa păng câu lạc bộ hŏk tro 3 ‘lơ̆ng”.

Hăm dôm tơdrong jang lăp ‘lơ̆ng, ƀĕnh đon adrin, ƀok thây mơlôh Phan Mạnh Tiến oei tơgop vei rong 1 chăl hŏk tro băl ‘mêm băl, đei đon jang tơnăp păng hơpơi ‘meh jang tŏk ăn kơdih. Kiơ̆ đơ̆ng dôm jơ hŏk tôch hơiă, ƀok thây hlôi tơiung đei jơhngâm hưch hanh vă đe oh hŏk tro roi ‘mĕh hŏk păng hŏk nơ̆r teh đak đe roi gơ̆h ƀiơ̆./.