VOV4.Bahnar - Pơgê năr 11/5, Thủ tướng Phạm Minh Chính chĕp kơ̆l Khŭl kơdră tang măt tĕh đak Việt Nam hlôi năm trŭh tơ̆ Washington (Mi) iung năm tơmang vang Hop akom Kơdră kơpal ASEAN - Mi.

Thủ tướng Phạm Minh Chính năm trŭh hơnĭh tơm Washington (Mi)

Tơ̆ Hop akŏm kơdră kơpal gĭt kăl au, Kơdră chĕp pơgơ̆r rim tĕh đak ASEAN hăm Ƀok Kơdră tơm Mi gô lăng hơlen dơ̆ng trong jang tơbôl ƀar păh lơ̆m 45 sơnăm au ki păng tơlĕch trong jang atŏk tơ iung tơgoăt tơgoăl ASEAN - Mi lơ̆m chăl kơnh, adoi ‘măn jơ ‘năr pơma dơnŭh găh rim tơdrong lơ̆m tơring păng lơ̆m apŭng plĕnh tĕh vang lăng trŭh. Jei lơ̆m ‘măng bơ̆ jang au, Thủ tướng Phạm Minh Chính gô đei sơng pơma dơnŭh hăm kơdră chĕp pơgơ̆r mĭnh ƀar hơnĭh bơ̆ jang, khŭl jang apŭng plĕnh tĕh, hơnĭh mơdro sa, bơngai joăt joa kơ Mi; năm ngôi rim hơnĭh jang mŭk drăm, jŏh ayŏ, pơtho pơhrăm Mi; vang năm rim tơdrong pơgơ̆r pơtrŭt mơdro sa, tơmang pơ hiơ̆ păng tơmơ̆t jên jang. Thủ tướng jei ‘măn jơ ‘năr tơ ƀơ̆p kon pơlei Việt Nam oei tơ̆ tĕh đak Mi. 

Tơblơ̆ nơ̆r: Amazưt