Tơ̆ ‘măng hop akŏm, 2 păh hlôi pơma dơnuh drơ̆ng 1 nơ̆r, mă hơdăh ‘noh dôm nơ̆r tơgop pơtôch đơ̆ng 2 Anih tơm Chĭnh trĭ lơ̆m Drơ̆ng nơ̆r Tơlĕch tơdrong jang hơdai đơ̆ng 2 teh đak sơnăm 2023 păng gô pơgơ̆r tơlĕch jang kiơ̆ kơtang hloi iŏk đơ̆ng blŭng sơnăm vă pơtrŭt jang hơdai lơ̆m đĭ đăng dôm tơdrong jang chĭnh trĭ - tơpôl - vei sơ đơ̆ng teh đak, tơmơ̆t jên jang - mơdro sa.

Găh trong vă jang hơdai tơ̆ hơnăp kơnh, 2 păh hlôi drơ̆ng nơ̆r akŏm bơ̆jang kiơ̆ ‘lơ̆ng dôm tơdrong tơchơ̆t atŭm, drơ̆ng nơ̆r đơ̆ng 2 Anih tơm Chĭnh trĭ, drơ̆ng nơ̆r 2 khŭl kơdră teh đak găh tơdrong jang hơdai 10 sơnăm jăl jang 2021-2030 păng tơdrong tơchơ̆t jang hơdai 2021-2025 păng dôm tơdrong drơ̆ng nơ̆r nai. 2 păh pơma hơdăh hơdrin păng khŏm athei tơgŭm băl pơjing mŭk drăm hiôk hian, pơm tơm kơ dih tơklep hăm mơ̆t jang hơdai hăm apŭng plĕnh teh jrŭ să păng đei yua.