VOV4.Bahnar - Hơlen Nơ̆r tơbăt đơ̆ng Cổng Thông tin điện tử Tĕh đak găh pơtôch ‘măng pơma dơnŭh “Rim trong jang vă hơmet pơ ‘lơ̆ng tơdrong ư̆h kơ măh pơgang, tơmam drăm jang pơgang”, Thủ tướng Tĕh đak Phạm Minh Chính đei nơ̆r pơrô̆ tơ̆ hơla au: Kơdră chĕp pơgơ̆r Dơnŏ anĭh tơm vei lăng jang pơgang dang ei chă tơchĕng hơlen, lăng hơlen nơ̆r athei đơ̆ng khŭl joăt jang lơ̆m hla bơar chĭh tơbăt pơtôch ‘măng pơma dơnŭh vă pơrô̆ jang kiơ̆ rim trong jang trŏ ƀlep, tơtom hơmet pơ ‘lơ̆ng tơdrong ư̆h kơ măh pơgang, tơmam drăm jang pơgang tơ̆ rim hơnĭh jang, Trung ương, dêh char, apŭng, hơnĭh tơm jang pơgang, hơlen hơdăh tơdrong yă kiơ pơm ăn ư̆h kơ măh pơgang kơ rim hơnĭh bơ̆ jang. Dơnŏ anĭh tơm vei lăng jang pơgang tĕnh koăng hơmet ming păng hrôi tơlĕch jang kiơ̆ rim tơdrong tơchơ̆t jang kiơ̆ đei ƀơm trŭh tơchă bơngai  tơmơ̆t jên jang, tơdrong tơchơ̆t găh hơnăn pơgang, kơ jă pơgang, pơtho tơbăt răt tơmam drăm jang pơgang.

Tơblơ̆ nơ̆r: Amazưt