VOV4.Bahnar - ‘Năr 6/2, Thủ tướng Phạm Minh Chính păng Khul jang đơ̆ng Khul kơ dră tĕh đak truh dăr lăng, pơ lung đe công nhân oei bơ̆ jang man cham gre păr Long Thành. Tơ drong jang man Cham gre păr Long Thành jăl 1 đei Thủ tướng tĕh đak kĭ jăl 1 lơ̆m ‘năr 1/1/2020, khei ‘năr bơ̆ jang đơ̆ng sơ năm 20020-2025. Hơ len năng tơ drong jang, Thủ tướng Phạm Minh Chính tơ tăm, truh dang ei lơ tơ drong jang tam mă đei tơ lĕch jang ‘lơ̆ng.

Kiơ̆ Thủ tướng, đon tơ chĕng, trong pơ gơ̆r, bơ̆ jang nhen hrei ‘nâu ‘nŏh tam mă ‘lơ̆ng. Yoa thoi nŏh dôm anih tơm, anih jang kơ pal, anih ming man athei jang hơ doi mă kơ jăp, tơ plih ‘nao trong jang; băt ‘mêm tơ drong jang nhen thoi ‘mêm kon hơ ‘lơ̆p kơ dih thoi nŏh gơ̆h jang đei hrĕnh ‘lơ̆ng. “Athei dôm anih tơm, anih jang kơ pal pơm hơ dăh hơ năp jang, bu jang gơ̆h ‘nŏh athei adrin jang mă ‘lơ̆ng; bu jang ưh gơ̆h ‘nŏh vĕh 1 păh lê̆ bơ ngai nai jang dơ̆ng”. Thủ tướng athei, dôm anih jang pơ ma nuh chă trong jang mă hơ dăh kiơ̆ rim năr, rim tơ drong jang.

Dơ̆ng: Tơ blơ̆