Thủ tướng athei dôm tơring jăh hơmet pơ ‘lơ̆ng unh điên, đak, trong, kơmăy kơmŏk roi tơbăt. Hơnơ̆ng hơlen năng, mong akŏm tơmam tơgŭm ăn dôm unh hnam pơmat tat, ưh kơmăh tơmam xa, chông kon pơlei tŏk oei tơ̆ tơring sơđơ̆ng; hơmet măh mai phe xa ƀa sŏng iŏk đơ̆ng ‘năr 14/11; atŭm hăm ‘nŏh hơnơ̆ng krao hơvơn dôm anih tĕch mơdro, bơngai đei đon ‘lơ̆ng "vang tơgŭm ăn kon pơlei" yak hlŏh pơmat tat. Adrol kơ ‘nŏh, lơ̆m ‘măng năm bơ̆ jang tơ̆ dêh char Gia Lai, ‘năr 13/11, Thủ tướng Phạm Minh Chính hlôi năm ngôi, bơ̆jang hăm Ƀô đô̆i vei lăng tơring sơlam dêh char Gia Lai, pơgơ̆r hop akŏm hăm dôm anih tơm, anih jang kơpal, kơdră chĕp kơ̆l tơm kơ dêh char Gia Lai găh tơdrong hơmet pơ ‘lơ̆ng hiong răm đơ̆ng ‘mi kial kơsô̆ 13.

Thủ tướng athei dêh char ‘măn hloi 60 ti hlak jên vă pơjing Anih oei xa ‘nao ƀât oei đei tơdrong kăl dang ei, pơm ‘lơ̆ng ăn mih ma duch nă gơ̆h đei anih oei xa ‘nao sơđơ̆ng ‘lơ̆ng. Pơma truh tơdrong kăl athei iung ming dơ̆ng tơdrong choh jang xa, tĕch mơdro, Thủ tướng athei dôm khul linh bơ̆jang mă pran vang tơgŭm hơmet pơ ‘lơ̆ng cham char, hơmet ming anih jang xa. Rim anih mong jên athei pơdui khei ‘năr kla hre, đei trong asong tŏk iŏk jên vă anih tĕch mơdro hơmet pơ ‘lơ̆ng hiong răm đơ̆ng ‘mi kial, pơdui khei ‘năr kla thuê̆, nôp jên; jăh hơmet pơ ‘lơ̆ng dơ̆ng dôm Hnam trưng păng anih jang pơgang. Dêh char Gia Lai hlôi chih akŏm đĭ đăng hiong răm dang 5.900 ti hlak jên, Thủ tướng athei Anih tơm vei lăng jên hu hơmet jên vă đei trong tơgŭm mă lăp păng tơtom./.