VOV4.Bahnar - Kơsơ̆ năr 10/10, Thủ tướng Tĕh đak ‘nao chĭh pơtrŭh hla bơar athei Kơdră chep pơgơ̆r Dơnŏ anĭh vei lăng kon pơlei dêh char, pơlei tơm rim dêh char tơring Tŏk bŏk; Rim Dơnŏ anĭh bơ̆ jang đei ƀơm trŭh, rim hơnĭh chĭh kơtơ̆ng ang Trung ương, tơring, Dơnŏ anĭh chĕp pơgơr tang găn tŏ ‘mi kial pơrăm păng Dơnŏ anĭh bơ̆ jang tĕh đak tang găn tŏ ‘mi kial pơrăm păng tơpchă dŏng tŏ ‘mi kial pơrăm.

‘Mi tĭh pơm ăn đak lip tơ̆ Phú Yên

Lơ̆m hla bơar tơchơ̆t pơma hơdăh: Kơ yuơ đei ƀơm đơ̆ng ‘năr tơngiĕt, tơring Tŏk bŏk rŏ năng oei hơnơ̆ng đei ‘mi tĭh lơ̆m khei năr kơnh, hơmơt đei đak jrŏh, đak lip kơtang tơ̆ tơring thŭng, tĕh tơdrŭt hơlĭh, đak lŏk jrŏh tơ̆ tơring groi kông ư̆h kơ gơ̆h yak tơ̆ au tơ̆ to, pơm kơnê̆ trŭh jang sa, erĭh sa kơ kon pơlei. Thủ tướng Tĕh đak pơrô̆, athei Kơdră chep pơgơ̆r Dơnŏ anĭh vei lăng kon pơlei dêh char, pơlei tơm rim dêh char tơring Tŏk bŏk iung jang hloi dăr lăng kơ jăp tơdrong ‘mi kial hơbŭt hơbông, dăr lăng iung jang yông kon pơlei lĕch vĕh đơ̆ng tơring hơmơt, tơring đak lơ̆p jrŭ, đak jăng, pơtho ăn kon pơlei vei lăng kơdĭh sơđơ̆ng, pơm dă ƀiơ̆ hiong răm mư̆h đei ‘mi kial hơbŭt hơbông, đak lơ̆p pơrăn, hơmet pơ ‘lơ̆ng măh mai phe sa ƀa sŏng, tơmam drăm sa ăn kon pơlei tơ̆ rim tơring hơmơt ư̆h kơ gơ̆h yak tơ̆ au tơ̆ to kơ yuơ đak lơ̆p, tĕh tơdrut hơlĭh, iung jang hloi chă tơgŭm djru ăn rim ŭnh hnam kon pơlei hơmơt đei tơdrong pơngot rơvĕt.

VOV/Amazưt tơblơ̆ nơ̆r