Tơ̆ jơ tơƀâp, Thủ tướng thơ thou ăn dôm bơngai jang khoa hŏk, bơngai juăt jang, bơngai vei lăng Anih jang pơgang, khul ƀak si, ƀok thây pơgang dôm chư: "Vei kơjăp đon ‘lơ̆ng đơ̆ng bơngai jang pơgang – Bơ̆ jang gơ̆h hơgei – Đei jơhngâm đon hơđơ̆ng- Yak hlŏh rim tơdrong pơmat tat- Đĭ đăng yoa kon pơlei" păng athei "Anih jang pơgang ưh gơ̆h hŭt lê̆ rim tơdrong ‘lơ̆ng vă dŏng hơmet ăn bơngai jĭ mă đơ̆ng iĕ hlŏh".

Thủ tướng pơma hơdăh, Năr ƀok thây pơgang Việt Nam 27/02 jĭ jơnăr gĭt kăl vă khul kơdră teh đak păng đĭ đăng tơƀôh đon bơnê hăm rim jơhnơr ƀok thây pơgang, dôm bơngai juăt jang, bơngai jang khoa hŏk, bơngai vei lăng păng đe kăn ƀô̆, bơngai jang tơ̆ anih jang pơgang yoa dôm tơdrong tơgop tih tên, ‘lơ̆ng hơiă ăn tơdrong vei lăng năng tông păng pơm hơtŏk jơhngâm pran ăn kon pơlei. Thủ tướng akhan, Đảng, Teh đak chih hơdăh, vei lăng năng tông păng pơm hơtŏk jơhngâm pran ăn kon pơlei jĭ tơdrong jang chinh trĭ tơm, đei pơ ‘nhŏ hơdrol lơ̆m rim trong bơ̆ jang, tơdrong tơgŭm jang tŏk; jĭ hơnăp đơ̆ng rim anih jang chinh trĭ, đĭ đăng tơpôl păng rim răih kon pơlei.

Yak mât lơ̆m chăl jang tŏk ‘nao kơ teh đak, hăm đon pơhnŏng ưh đei pơdơ̆h vă pơm hơtŏk jơhngâm pran, hơkâu jăn, sơnăm arih sot, arih xa ‘lơ̆ng hơiă đơ̆ng bơngai Việt Nam, Thủ tướng athei hơnơ̆ng hơmet pơ ‘lơ̆ng trong pơgơ̆r, tơdrong tơgŭm păng bơ̆ jang đei yoa dôm tơdrong hơgăt đơ̆ng luơ̆t găh jang pơgang; akŏm jơhngâm pơm hơtŏk tơdrong rơgei ăn rim anih jang pơgang tang găn jĭ, hnam pơgang, hơtŏk tơdrong pran ‘lơ̆ng đơ̆ng Anih jang pơgang y học cổ truyền. Hơmet ming anih jang pơgang tŏ sĕt bơngai, bơ̆ jang rơgei, đei yoa, pơm ‘lơ̆ng ăn tơdrong jang hơdoi đơ̆ng rim anih. Hơmet pơkĕh hơnăp jang, tơdrong jang, khul jang tơ̆ rim hnam pơgang xăh.