VOV4.Bahnar - ‘Năr 17/4, Thủ tướng teh đak Phạm Minh Chính păng Khŭl bơ̆ jang kơ Khŭl kơ dră teh đak hlôi bơ̆ jang hăm kơ dră chĕp kơ̆l dêh char Ninh Thuận găh tơ drong, pơ tôch jang kiơ̆ hơ năp jang sơ năm 2021, jăl khei mă I/2022 păng trong vă jang sơ năm 2022; pơ tôch 03 sơ năm jang kiơ̆ tơ drong tơ chơ̆t 115 đơ̆ng Khŭl kơ dră teh đak.

Pơ ma tơ̆ jơ bơ̆ jang, Thủ tướng Phạm Minh Chính tơ băt ‘măng hop akŏm vă hơ len lăng, lăng ‘lơ̆ng dôm tơ drong Ninh Thuận hlôi jang đei, dôm tơ drong tam mă jang đei khei ‘năr âu ki, tơ blang hơ dăh tơ drong tơm pơm ăn, băt hơ dăh dôm trong vă jang, tơ drong hơ găt, đon tơ chĕng pơ gơ̆r, trong jang tih lơ̆m sơ năm 2022 păng tơ̆ hơ năp kơnh; kiơ̆ lơ̆m tơ drong tơ chơ̆t Hop akŏm XIII kơ Đảng, trong tơ lĕch jang 5 sơ năm, tơ drong jang 10 sơ năm hơ tŏk tơ iung mŭk drăm - tơ pôl teh đak, tơ chơ̆t Hop akŏm Đảng bộ dêh char, dôm tơ drong tơ chơ̆t tơ drong jang đơ̆ng Trung ương, kăl pơ gơ̆r jang kiơ̆ tơ tĕnh, lăp hăm tơ drong lơ̆m tơ ring. Tơ̆ hơ năp kơnh, dêh char kăl hơ tŏk pran kơ tang tơ mam ‘lơ̆ng pha ra băl, tơ drong hiôk, đei yua pơ jei băl, tơ plih long nol jing tơ drong hiôk, tơ plih dôm tơ drong hiôk jing tưk tơ iung ‘nao, jên jang ‘nao, pơm hơ iă tơ drong ‘nao, hơ nih ‘nao ăn tơ drong hơ tŏk tơ iung, hơ nhăk ăn tơ drong arih sa roi ‘năr roi phĭ tơ nŏ, hiôk hian ăn kon pơ lei.

Thuem: Tơ blơ̆