Hơmet pơ ‘lơ̆ng nơ̆r apĭnh, dôm tơdrong mơmat tat, tơhlăk tơhlĭn vă tơgŭm Bạc Liêu hơtŏk ‘lơ̆ng hloh dôm tơmam ‘lơ̆ng, tơdrong pran, hơtŏk tơiung hrĕnh, kơjăp. Pơma tơ̆ jơ bơ̆jang, Thủ tướng Phạm Minh Chính athei, dêh char Bạc Liêu hơnơ̆ng vei kơjăp, tơlĕch jang kiơ̆ đei yua tơdrong Tơchơ̆t Hop akŏm XIII kơ Đảng; Tơchơ̆t Hop akŏm Đảng bộ dêh char.

Kŭm hăm ‘noh Thủ tướng athei, lăng kăl tơdrong jang proh hơmet vă hơtŏk dôm tơmam ‘lơ̆ng, tơdrong pran, pơih ăn tơdrong hiôk hơtŏk tơiung ‘nao. Tơtĕnh jang đang, pơtruh ăn Thủ tướng teh đak kĭ ăn păng tơlĕch jang kiơ̆ đei iŏk yua tơdrong Proh hơmet đơ̆ng dêh char đơ̆ng sơnăm 2021 - 2030, lăng truh sơnăm 2050. Hơtŏk loi dơ̆ng vei sơđơ̆ng teh đak, vei kơjăp tơdrong sơđơ̆ng chĭnh trĭ, sơđơ̆ng tơpôl; jang hơdai kơjăp hăm teh đak buăl vei sơđơ̆ng tơring sơlam, pơm tơdrong hiôk păng hơnih ‘lơ̆ng hơtŏk tơiung mŭk drăm tơpôl.