VOV4.Bahnar - Kơsơ̆ năr 30/9, tơ̆ Hà Nội, Thủ tướng Cộng hòa Cuba Manuel Marrero Cruz sơng pơma dơnŭh hăm Khŭl tơgoăt tơgoăl Việt Nam-Cuba păng Jơnŭm rim Hơnih bơ̆ jang tơgoăt tơgoăl Việt Nam ƀlep lơ̆m ‘măng năm tơmang tơ̆ Việt Nam.

Kơdră chĕp pơgơ̆r Khŭl Tơgoăt tơgoăl Việt Nam-Cuba Vũ Hải Hà pôk ăn tơmam drăm

Kiơ̆ kơ ‘nŏh, lơ̆m rim ‘măng tơƀơ̆p, kơdră chĕp pơgơ̆r ƀar tĕh đak, hăm jơhngơ̆m đon tơgoăt tơgoăl ‘lơ̆ng hơ iă, lui kiơ̆ dĭh băl, ling lang atŏk kơtang hơnăp jang hăm tơdrong tơgoăt tơgoăl ƀar păh ƀar hơdrung, pơkăp hơnơ̆ng atŏk kơtang hlŏh dơ̆ng tơgoăt tơgoăl jang hơdoi dĭh băl. Thủ tướng Manuel Marrero Cruz tơbăt, mă đơ̆ng tŏk bŏk tơjră mŭh măt hăm lơ tơdrong long nhen pơvang tang găn mơdro sa, sar bar đơ̆ng jĭ hơbŭh Covid-19 pơm ăn, mă lei Cuba oei hơdrin hơmet pơ ‘lơ̆ng păng atŏk tơ iung mŭk drăm. Iung pơma tơ̆ jơ tơƀơ̆p, Kơdră chĕp pơgơ̆r Dơnŏ anĭh jang Hơpeh hơpong hăm tĕh đak đe kơ Kuô̆k hô̆i, Kơdră chĕp pơgơ̆r Khŭl Tơgoăt tơgoăl Việt Nam-Cuba, Kơdră chĕp pơgơ̆r Khŭl Nghĭ si tơgoăt tơgoăl Việt Nam-Cuba Vũ Hải Hà lui akhan, hăm tơdrong chĕp pơgơ̆r đơ̆ng Đảng Cộng sản Cuba, kon pơlei Cuba ‘nhŏng ŏh gô jang kiơ̆ keh đang trong jang mŭk drăm-tơpôl xã hội chủ nghĩa păng trong tơlĕch jang tơ iung pơjing tĕh đak pơm tơm kơdĭh, rơngei hiôk hian, xã hội chủ nghĩa, hơtŏ hơnơ̆ng, pơdrŏng hơnŭk hơnoa păng kơ jăp ‘lơ̆ng.

VOV/Amazưt tơblơ̆ nơ̆r