Tơ̆ 'măng hop akŏm, Thủ tướng ră hơdah, hơtŏk hnam oei tĕch răt păng hnam oei ăn thuê athei mă trŏ hăm tơdrong kĕ kla jĭ minh trong jang tih đơ̆ng Đảng păng Teh đak. Thủ tướng pơgơ̆r athei tơplih đon tơchĕng đơ̆ng pơm hnam oei tĕch răt jing hơtŏk tơ-iung hơdoi man hnam oei tĕch răt păng hnam oei ăn thuê hloi, lơ̆m noh hnam oei ăn thuê đei sơkơ̆t jĭ trong jang tơm, đunh khei năr, 'măn ăn lơ kon pơlei kăl, mă kăl noh kŏng nhơ̆n, bơngai jang, sinh viên, khul linh...

Thủ tướng pơgơ̆r hăm pơlei tơm Hà Nội pơtơm jang hơdrol, athei yuk hơlou, tenh kuăng hơlen tôm pơkăp yua teh, pơkăp tơring kơdrơ̆m păng tơring pơsĕl... vă đei trong jang hơtŏk pơm hnam oei ăn thuê; hơdrin pơm kiơ̆ tơdrong tơlĕch jang lơ̆m khei 6 truh. Hơnih tơm Ming man kơchăng chih akŏm tơbang tơchơ̆t jang 'nao, pơkăp hơtŏk hnam oei ăn thuê vă rim tơring tơlĕch man hnam oei ăn thuê păng Hơnih tơm tơlĕch chă dăr lăng. Atŭm hăm noh, Hơnih tơm Ming man kơchăng jang atŭm hăm dôm tơring, hơdrol hloh noh Hà Nội, pơlei tơm Hồ Chí Minh, Đồng Nai, Hải Phòng, Đà Nẵng chih um la kak gah tơdrong kăl hnam oei ăn thuê vă pơm trong akŏm pơm jang; pơgơ̆r jang atŭm hăm rim hơnih jang tơm, rim tơring hơlen lăng pơjao hơdah hơtŏk hnam oei ăn thuê lơ̆m jơ̆p teh đak, vă pơtruh ăn Thủ tướng lơ̆m khei 7/2026.