VOV4.Bahnar - Kơ sơ̆ ‘năr 6/2, hơ nơ̆ng tơ drong jang hơ len lăng, kiơ̆ hơ len rim tơ drong jang tơm anih jang găh trong nơ năm, gre kơ dâu, Thủ tướng Phạm Minh Chính hlôi năm hơ len lăng, kiơ̆ hơ len, băt hơ dăh tơ drong, hơ met ‘lơ̆ng dôm tơ drong mơ mat tat, tơ hlăk tơ hlĭn păng pơ lung, hmach têt kơ khŭl kang ƀô̆, bơ ngai jang tŏk bŏk bơ̆ jang tơ̆ hơ nih jang pơm trong gre kơ dâu hrĕnh Mỹ Thuận – Cần Thơ păng tơ drong jang pơm gơng Mỹ Thuận 2. Trong gre kơ dâu hrĕnh Mỹ Thuận - Cần Thơ năm klĕch 2 dêh char Vĩnh Long, Đồng Tháp. Đơ̆ng rŏng kơ trong gre kơ dâu hrĕnh âu pơm đang, hơ dai hăm trong pơ lei tơm Hồ Chí Minh - Trung Lương, Trung Lương - Mỹ Thuận păng gơng Mỹ Thuận 2, pơm jing trong gre kơ dâu hrĕnh ‘lơ̆ng đơ̆ng pơ lei tơm Hồ Chí Minh - Cần Thơ, tơ gop tơ jur tơ drong ưh kơ ‘lơ̆ng trong nơ năm, gre tơ̆m preh băl tơ̆ trong gre kơ sô̆ 1. Tơ̆ âu, Thủ tướng athei, dêh char Vĩnh Long păng dêh char Đồng Tháp tơ tĕnh jang đang pơ tôch tơ drong chưk hơ met teh ăn tơ drong jang; rim pang ƀơm truh jang hơ dai kơ jăp vă hơ tŏk jang hrĕnh 3 khei păng hơ tŏk tơ drong ‘lơ̆ng. Thủ tướng mĭnh ‘măng dơ̆ng tơ rĕk truh tơ drong tơ lĕch jang rim tơ drong jang pơm trong gre kơ dâu hrĕnh kăl kơ năm kiơ̆ trong tơ păt hloh, kơ đeh hloh; hơ dai hăm ‘noh, rim tơ drong hơ tŏk jơ hngơ̆m đon kơ drin kơ dih, tơ mơ̆t jên jang đei tơ drong kăl, tơm, ưh kơ răp pơ mơ̆ng lơ̆m Trung ương lơ̆m tơ drong ming man rim trong gre kơ dâu hrĕnh.

Thuem: Tơ blơ̆