VOV4.Bahnar - ‘Năr 18/9, Thủ tướng Phạm Minh Chính păng khul jang truh dăr lăng tơ̆ anih bơ̆ jang, hơ len păng athei hơ tŏk tơ drong jang man 3 tŏ hnam pơ gang tih tơ̆ dêh char Hà Nam, đei anih mă 2 kơ Hnam pơ gang hơ met jĭ ăn bơ ngai kră, anih 2 kơ Hnam pơ gang Việt Đức păng anih 2 kơ Hnam pơ gang Bạch Mai. Dôm hnam pơ gang âu đei Anih tơm vei lăng jang pơ gang kĭ sơ năm 2014, tơ lĕch jang sơ năm 2015, hơ mĕng gô jang đang sơ năm 2017, mă lei truh dang ei oei tam mă mât bơ̆ jang. 

Thủ tướng păng khul jang truh hơ len păng athei hơ tŏk tơ drong jang man hnam pơ gang tih tơ̆ dêh char Hà Nam

Thủ tướng athei Anih tơm vei lăng jang pơ gang păng dôm anih jang kơ pal chih hơ dăh dôm tơ drong tơ hlăk, mă loi ‘nŏh tơ drong glăi đơ̆ng blŭng pơ jing tơ drong jang, roi tơ ƀôh trong man, hơ len năng, kĭ pơ kăp hla ar jang, ming man, pơ lăp bơ̆n kơ măy...; mă loi chih hơ dăh tơ drong tơm păng hơ năp jang lê̆ đei tơ drong tơ hlăk ‘nâu. Kiơ̆ Thủ tướng tơ drong tơ mât jên man hnam pơ gang dang ei đĭ hiơ̆ lơ sơ năm bơih, jên man tŏk lơ hlŏh dơ̆ng. Tơ drong tơm ‘nŏh yoa dôm tơ drong ưh ‘lơ̆ng, tơ drong glăi đơ̆ng blŭng pơ jing tơ drong jang, roi tơ ƀôh, hơ len năng tơ drong jang, tơ chơ̆t tơ mât jên jang, rơih anih jang, kĭ pơ kăp, chă rơih kơ jă păng pơ gơ̆r bơ̆ jang.

Thủ tướng Phạm Minh Chính athei pơ jing Grŭp jang yoa kơ dră chĕp kơ̆l Anih tơm vei lăng jang pơ gang chĕp kơ̆l, hăm tơ drong vang akŏm đơ̆ng kơ dră chĕp kơ̆l dôm Anih tơm tơ lĕch nơ̆r sơ kơ̆t, tơ mât jên jang, Anih tơm vei lăng ming man, jên hu, Tư Phap păng Dơ nŏ anih vei lăng kon pơ lei dêh char Hà Nam jăh pơ gơ̆r dăr hơ len năng rim tơ drong mưh bơ̆ jang; hơ len năng trong pơm hla ar, chih akŏm đĭ đăng jên tơ mât jang, khei ‘năr hơ găt jang păng dôm tơ drong mơ mat tat, tơ hlăk tăk nai.

Dơ̆ng: Tơ blơ̆