Tơ̆ jơ tơƀâp, Thủ tướng Phạm Minh Chính tơƀôh đon pơngơ̆t hăm rim tơdrong tơ̆ tơring Ving hrei ‘nâu; hơpơi ‘mĕh kŭm hăm Qatar vang tơgop chă trong rơngei, sơđơ̆ng ‘lơ̆ng ăn tơring Trung Đông. Thủ tướng ăn tơbăt hlôi đei jơ pơma điên thoăi hăm Thủ tướng, Kơdră tơm jang tơbôl teh đak Qatar, Việt Nam tơƀôh đon mơnat hăm dôm teh đak tơring Ving, păng lăp đon hăm tơdrong Tơchơ̆t đơ̆ng Liên Hợp quốc athei găn pơtôch dôm tơdrong tơblăh tơdrŭt dôm teh đak; ưh gơ̆h tơblăh tơdrŭt dôm anih oei xa, bơ̆ jang kơ kon pơlei. Thủ tướng akhan, Việt Nam sơ̆ jĭ teh đak pŭ tơdrong tơblăh đunh đai, đei teh đak nai pơvang găn, yoa thoi noh băt hơdăh kơjă kăp gĭt  đơ̆ng rơngei; hơpơi ‘mĕh dôm pang jăh chă đei trong jang ‘lơ̆ng, găn pơtôch hloi tơdrong tơblăh vang.

Thủ tướng Phạm Minh Chính hơpơi ‘mĕh tơdrong tơblăh jăh tôch vă dôm hnam kơmăy tơ̆ Qatar jăh iung jang xa dơ̆ng, chă tĕch mơdro đak dâu tơ̆ teh đak đe. Pơma hơdăh athei chă trong hơmet pơ ‘lơ̆ng tơdrong ‘nâu, Thủ tướng hơpơi ‘mĕh Qatar hăm tơdrong jang gơ̆h, đon rơgei đơ̆ng kơdih vang tơgŭm, tơlĕch jên jang tơ̆ Việt Nam man dôm anih mong kơchơ̆t soh pơyoa ăn Hnam kơmăy unh điên kŭm nhen pơtruh kơchơ̆t sŏh ăn tơring.