Tang măt ăn kơdră chĕp kơ̆l Đảng, Teh đak, Thủ tướng pôk pơ ư păng hơiă hăm dôm tơdrong jơnei tôch 'lơ̆ng mă Hnam hŏk Khŭl lĭnh vei lăng teh đak hlôi iŏk đei lơ̆m 50 sơnăm âu ki. Hnam hŏk hlôi pơtho pơhrăm, pơtho ming dơ̆ng ăn rơbâu 'nu kăn ƀô̆ gĭt kăl kơ Đảng, Teh đak păng khŭl lĭnh; adrin tơchĕng hơlen khoa hŏk, chih răk rim tơdrong tơ̆ yăn âu, hơtŏk tơdrong tơblang hơdăh păng trong tơblăh ăn khŭl lĭnh teh đak Việt Nam.

Tơ̆ hơnăp apŭng plĕnh teh oei đei lơ tơdrong krê hơmơt păng tơdrong athei vei lăng teh đak roi đunh roi dêh, Thủ tướng Lê Minh Hưng pơma tơƀôh tơdrong jang tơm mă Hnam hŏk Khŭl lĭnh vei lăng teh đak athei akŏm jơhngâm bơ̆jang. Thủ tướng athei pơjing tơdrong 'lơ̆ng mưh pơtho pơhrăm, pơtho ming ăn kăn ƀô̆ dang ei păng kăn ƀô̆ tih, gĭt kăl kơ Đảng, Teh đak, khŭl lĭnh tơblăh, hơdai hăm hơtŏk loi dơ̆ng tơdrong 'lơ̆ng mưh tơchĕng hơlen khoa hŏk; hơnhăk Hnam hŏk jing hơnih tơm jang tơgŭm gĭt kăl, tơm dơnơm găh khŭl lĭnh, vei sơđơ̆ng teh đak kơ tơring./.