Đơ̆ng rŏng 1 sơnăm tơlĕch tơdrong jang 06 păng pơtôch tơdrong jang đơ̆ng Anih jang kơ tĕh đak găh tơplih hăm kơmăy sô̆ hlôi iŏk đei lơ tơdrong gĭt kăl, mă loi jĭ đon hlôh vao păng bơ̆ jang tơplih kơmăy sô̆ kơ tĕh đak tŏk ‘lơ̆ng, păr ang truh tơ̆ jơ̆p anih jang, tơring tơrang, mă loi hăm bơngai chĕp kơ̆l;

Tơdrong hơmet pơ ‘lơ̆ng trong chĕp kơ̆l pơgơ̆r, tơdrong tơgŭm, pơ jing khôi luơ̆t hiôk hian ăn tơdrong tơplih hăm kơmăy sô̆ đei kơdră chĕp kơ̆l tôch tơrĕk, pơgơ̆r bơ̆ jang iŏk đei jơnei ‘lơ̆ng; Đĭ đăng anih tơm, anih jang kơpal, tơring tơrang hlôi tơlĕch trong jang tơplih kơmăy sô̆ lơ̆m 5 sơnăm. Mă loi, Anih tơm vei lăng Công an hlôi tơlĕch jang tôch pơnĕh tơdrong chih răk kơsô̆ tĕh đak găh kon pơlei oei xa, dar dĕh pơjing kơsô̆ ăn đĭ đăng kon pơlei.

Pơma tơ̆ hop akŏm, tang măt ăn Khul kơdră tĕh đak, Thủ tướng Phạm Minh Chính pôk pơ ư dôm tơdrong adrin păng jang đei đơ̆ng rim anih tơm, anih jang kơpal, tơring tơrang; Thủ tướng tơroi, sơnăm 2023 tơdra hơdrol tơdrong ‘lơ̆ng, hiôk hian păng mơmat tat đei hrâu hăm băl, mă lei mơmat tat, pơlong nol đei lơ ƀiơ̆, tih ƀiơ̆. Tơdrong jang tơplih hăm kơmăy sô̆ kơ tĕh đak tôch trăp trĭn, athei bơ̆n adrin tôch ai, adrin mă brĕ, bơ̆ jang mă pran hlŏh dơ̆ng.