VOV4.Bahnar – Kơsơ̆ năr 14/10, tơ̆ Hnam Kuôk hô̆i pơgơ̆r Hop akŏm Đảng Khul Kuôk hô̆i hăm Jơnŭm pơgơ̆r jang Đảng Khul Kơpal teh đak găh tơdrong hơmet ăn 'măng Hop akŏm mă 4, Kuôk hô̆i jăl 15.

Thủ tướng teh đak bơ̆n Phạm Minh Chính, Kơdră Kuôk hô̆i Vương Đình Huệ vang năm akŏm păng pơgơ̆r hŏk hôp. Kiơ̆ kơ Tổng thư kĭ Kuôk hô̆i, Kơdră Anih jang Kuôk hô̆i Bùi Văn Cường, 'măng hop akŏm âu, Kuôk hô̆i gô bơ̆ jang lơ̆m 21 năr, 'nguaih kơ dôm tơdrong chih akŏm luơ̆t gô đei tơgop nơ̆r păng hơlen oei đei lơ tơdrong “kăl” pơm pơngơ̆t đon lơ̆m tơpôl đei kon pơlei tơrĕk kăp gĭt gô đei rim bơngai tang măt ăn Kuôk hô̆i pơkăl tơblang pơm hơdăh lơ̆m tơdrong pơma đam găh mŭk drăm – tơpôl, jên mong kơ teh đak dăh mă dôm 'măng apinh jet.

Pơma ăh hop akŏm, Thủ tướng teh đak Phạm Minh Chính bơnê kơ tơdrong jang hơmet ăn 'măng hop akŏm mă 4 kơ Kuôk hô̆i, tơdrong jang hadoi hơmet ăn 'măng hop akŏm mă 4 đei pơm jang tơnăp, trŏ pơkăp. Ƀar păh hlôi jang atŭm kơjăp, đei jơnei, dôm tơdrong chih akŏm luơ̆t đei tơgop nơ̆r hlôi đei pơđăp hơdăh. Rim anih jang kơ Kuôk hô̆i păng anih jang tơm hlôi jang hadoi hăt hot chih akŏm păng pơtruh hla bar pơkăp đei iŏk jang lơ̆m tŏ xĕt khei năr păng jang hơƀăp.

VOV/Lan tơblơ̆