Akŏm kơchơ Pơyan Hla ruh 'măng mă mônh sơnăm 2025 đei pơgơ̆r tih hloh đơ̆ng sơ̆ truh dang ei tơ̆ Việt Nam, akŏm đei 2.500 anih jang mŭk drăm, anih jang lơ̆m păng 'nguaih kơ teh đak. Hăm hơnăn "Tơroh Kon bơngai hăm Pơm jang, Tĕch pơdro", tơdrong jang tĕch răt đei ƀôh hăt hot; kơ rơbou tơdrong pơkăp tĕch răt păng hla bar chih tơbăt asong jang hơdoi, tơroi dih băl gah trong jang 'nao đơ̆ng dôm anih jang mŭk drăm lơ̆m teh đak păng anih jang mŭk drăm Việt Nam hăm teh đak đe đei kĭ pơkăp, hăm kơjă pơkăp jang đei jê̆ 5.000 tih hlj. Akŏm kơchơ adoi jing lêh akŏm gah trong jang 'nao gơh hơgei păng joh ayŏ, anih sơkơ̆t hơdah kơjă kăp gĭt: "Hơtŏk mŭk drăm athei năm hơdoi hăm hơtŏk joh ayŏ, tơpôl păng kon bơngai".

Pơma ah Lêh pơtôch, Thủ tướng Phạm Minh Chính sơkơ̆t hơdah Akŏm kơchơ 'măng ou jĭ anih akŏm tơnăp vă hơtŏk tơdrong iŏk yua lơ̆m teh đak – minh tơdrong pran kăp gĭt vă hơtŏk pơm tơlĕch păng tĕch răt đơ̆ng teh đak – minh trong pơm jang 'nao 'lơ̆ng hăm dôm "tơdrong hơtŏk juăt jue" – jĭ gơng tơroh jang hơdoi tĕch pơdro lơ̆m apŭng plenh teh, pơm trong hơtŏk tơ-iung ăn tơdrong tĕch răt lơ̆m teh đak lơ̆m chăl anglŏ sơnăm 'nao. Thủ tướng adoi pơtruh nơ̆r bơnê hăm dôm tơdrong vang glơng tơnap tap hăm kon pơlei tơring đak hơbông kiơ̆ tơdrong akŏm "Pơyan Hla ruh hơpơi 'lơ̆ng", hăm kơsô̆ jên tơgŭm đei hloh 316 tih hlj. Thủ tướng sơkơ̆t hơdah, jơhngơ̆m đon tơgŭm dih băl ou jing tơdrong jang 'lơ̆ng hloh ăn tơdrong juăt jue kăp gĭt "đon bơnôh kon pơlei, 'mêm kơ-eng kon bơngai" kơ kon pơlei bơ̆n, jing tơdrong tơm păng jing jơhngơ̆m pran đei akŏm vă hơ-'nhăk teh đak hơtŏk tơ-iung kơjăp hloh jăl trong jang hơtŏk teh đak.