Tơ̆ 'măng hop akŏm, Thủ tướng pôk bơnê kơ dôm tơdrong hơdrin, tơdrong jang đei jơnei kăp gĭt mă Hơnih jang Đảng, Jơnŭm pơgơ̆r tơring păng kon pơlei pơlei tơm Cần Thơ hlôi jang đei lơ̆m khei năr ou ki. Mă thoi noh, Thủ tướng tơƀôh hơdah, tơdrong hơtŏk GRDP kơ pơlei tơm đei pơkăp dơ̆ng mă 31 lơ̆m 34 tơring; hơtŏk tơring jang kŏng ngĭp – ming man tam mă hơvơn đei tơdrong jang kŏng ngĭp pơm tơlĕch tơmam drăm, iŏk yua trong jang 'nao hơgei.

Thủ tướng pơgơ̆r hăm pơlei tơm Cần Thơ tơplih đon tơchĕng đơ̆ng pơm jang jing hơtŏk tơ-iung. Kăl tơlĕch dôm trong jang kăp gĭt vă tơring hơtŏk iŏk yua dôm mŭk drăm hlôi đei, mă kăl noh gah unh hơyuh 'lơ̆ng sơđơ̆ng, dơnŏk duk đak dơsĭ. Ră hơdah hơnih vă hơtŏk tơ-iung, Thủ tướng Lê Minh Hưng akhan, pơkăp jing tơdrong tơm vă hơvơn asong jang păng hơtŏk mŭk drăm – tơpôl. Thủ tướng athei dah tenh kuăng hơlen lăng, chih akŏm pơkăp kơ pơlei tơm gơnơm đơ̆ng tơdrong pơkăp tôm tong kơ teh đak, pơkăp tơring păng iŏk yua teh truh ou kơnh.