Kơtă năm asong tơmam ăn linh jĭ rơka, Thủ tướng Lê Minh Hưng ƀrơ̆k kơ jơhngơ̆m păng pơtruh nơ̆r apinh jet gia pơma dơnuh hăm tôm đe linh jĭ rơka, bơngai tơgŭm jơhngơ̆m ăn kăch mang lơ̆m jơ̆p teh đak. Thủ tướng sơkơ̆t hơdah, hram đon bơnôh  "nhă đak ƀlŏk kơ tu" păng nơ̆r pơtho đơ̆ng Ƀok Kơdră Hồ Chí Minh, lơ̆m 79 sơnăm kơ ou, Đảng păng Teh đak bơ̆n hơnơ̆ng tơrĕk pơm jang tơnăp tơdrong ƀlŏk băt pôk bơnê. Dôm tơchơ̆t tơgŭm roi năr roi 'lơ̆ng, bơngai đei xa yua lơ hloh.

Tơdrong jang "Tôm kon pơlei vei lăng unh hnam linh jĭ rơka, linh lôch tang păng bơngai tơgŭm jơhngơ̆m ăn kăch mạng" hlôi pơlan să kơtang, đei iŏk tơdrong drơ̆ng pơm kiơ̆ lơ̆m tơpôl. Dôm đon bơnôh păng sơnong jang noh hlôi akŏm đei đon bơnôh 'lơ̆ng pơtoi vei răk tơƀăk mong tơdrong juăt jue kơ kon pơlei. Thủ tướng sơkơ̆t hơdah: Đon bơnôh nuih mơng păng tơdrong plang đơ̆ng đe linh jĭ rơka jing tơdrong tơbang hơdah ăn tơdrong jang kăch mạng nuih mơng, jĭ hơnih gơnơm gah đon bơnôh kơjăp sơđơ̆ng ăn tôm hơnih jang chĭnh trĭ lơ̆m tơdrong jang tơplih 'nao ăn teh đak.