Kơsơ̆ năr 29/9, tơ̆ Anih bơ̆jang kơ Khŭl kơdră tĕh đak, Khŭl kơdră chĕp kơ̆l Đảng kơ Khŭl kơdră tĕh đak păng Khŭl kơdră chĕp kơ̆l anih jang Đảng Quốc hội pơgơ̆r hop akŏm dăr lăng hơlen tơdrong jang, hơmet pơ 'lơ̆ng dôm khôi luơ̆t, tơdrong tơchơ̆t păng hla ar tơroi hơmet ăn pơtrŭh ăn Quốc hội tơ̆ 'Măng hop akŏm mă 2, Quốc hội jăl XVI. Thủ tướng Lê Minh Hưng păng Kơdră Quốc hội Trần Thanh Mẫn vang pơgơ̆r hop akŏm. Tơ̆ 'măng hop akŏm au, Khŭl kơdră tĕh đak tơchĕng hơdrol pơtrŭh ăn Quốc hội 95 hla ar, hla ar chĭh roi păng hla ar tơbăt, lơ̆m ‘noh đei 44 luơ̆t păng tơdrong tơchơ̆t, đei 7 luơ̆t pơjing 'nao, 36 luơ̆t hơmet ming, tơmơ̆t dơ̆ng păng 1 tơdrong tơchơ̆t.

Khŭl kơdră teh đak tŏk bŏk hăt hot hơmet ăn hla ar hô sơ trong jang tơmơ̆t jên jang ăn dôm tơdrong jang tih kơ teh đak găh hơnăp jang Quốc hội set hơlen. Thủ tướng Lê Minh Hưng pơma hơdăh, tơdrong jang tôch kơ lơ, lơ luơ̆t đei ƀơm truh kơtă hăm kon pơlei păng anih mơdro sa, nhen Luơ̆t teh, Luơ̆t jên jang kơ teh đak, Luơ̆t tơmơ̆t jên jang teh đak hơdai, Khôi luơ̆t Hình sự păng Khôi luơ̆t Tơkêng tơdrong yoch. Thủ tướng athei rim anih jang jang hơdai kơjăp, hơmet ăn đơ̆ng hrôih, hơmet pơ 'lơ̆ng dôm tơdrong oei tơhlăk, vei sơđơ̆ng 'lơ̆ng păng tơdrong jang hô sơ pơtruh ăn 'Măng hop akŏm mă 2 kơ Quốc hội.