Hla bơar chih tơbăt bơ̆ jang tơƀôh hơdăh, 6 khei ou ki, rim hơnih tơm, hơnih jang, tơring hlôi tơlĕch jang lơ tơdrong jang pơting dih băl ‘mêm kơ eng teh đak tơklep hăm tơdrong jang atŏk tơ iung mŭk drăm-tơpôl. Mă kăl, năr 13/6, Thủ tướng tơlĕch jang pơting dih băl jang kiơ̆ trong tơlĕch jang tŏk mŭk drăm ƀar kơsô̆ jăl jang 2026 - 2030. Iung pơma tơ̆ Hop akŏm, Thủ tướng pơma hơdăh pơting dih băl kăl lăng truh jơnei tơpă, iŏk tơdrong tơgop ăn atŏk tơ iung teh đak, sơđơ̆ng teh đak, sơđơ̆ng tơring păng pơm hơtŏk tơdrong hơrih sa hiôk chơt ăn kon pơlei pơm ‘long pơtŏ jang ‘lơ̆ng, iung jang kơtang tang găn trong jang koă kơlê̆, pơdăr jang ‘lơ̆ng. Thủ tướng tơƀôh hơdăh, khei năr ou ki hlôi đei ƀôh lơ trong jang ‘nao, trong jang hơ iă jơnei kơtang. ‘Noh jĭ ‘măng iung jang pơm kơtoei khul kơdră chĕp pơgơ̆r, hơmet pơ ‘lơ̆ng tơdrong tơhlăk tơhlĭn ăn rim tơdrong vă jang tơm teh đak, dôm tơdrong jang ‘lơ̆ng hơ iă pơm ăn ƀrơ̆k jơhngơ̆m đơ̆ng tơdrong jang 500 măng năr năm tơchă, kôch akŏm păng hơlen băt hơdăh hơnăn ƀô̆ đô̆i lôch dŏng teh đak.