Tơ̆ jơ sơng, Thủ tướng chơt hơ-iă ƀôh đei lơ tơdrong hơtŏk 'lơ̆ng lơ̆m jang tơbôl Việt Nam - Angola lơ̆m khei năr ou ki, atŭm hăm noh pơtruh nơ̆r hăm 2 teh đak pơtoi hơtŏk tơdrong asong khŭl kơpal năm hơpeh hơpong dih băl, pơih să tơdrong jang hơdoi đơ̆ng rim hơnih jang tơm, rim tơring; tơroi gah tơdrong hlôh vao lơ̆m hơtŏk tơ-iung, jang hơdoi kơjăp păng tơgŭm dih băl lơ̆m tơdrong hop akŏm lơ teh đak.

Thủ tướng pơtruh nơ̆r hăm Jơnŭm pơgơ̆r teh đak Angola pơtoi pơm trong hiôk vă rim hơnih jang mŭk drăm Việt Nam, mă kăl noh Hơnih jang gah Kŏng ngĭp – Unh hơyuh kơ teh đak Việt Nam, pơih să tơdrong asong jang, tĕch pơdro tơ̆ Angola. Ƀar pah drơ̆ng nơ̆r hơtŏk pơma đam, dah hrôih keh đang păng kĭ pơkăp lơ hla bar jang hơdoi kăp gĭt lơ̆m tơdrong jang tĕch pơdro păng asong jang.