Tơ̆ jơ tơƀơ̆p, Thủ tướng sơkơ̆t hơdăh, Việt Nam lăng kơjăp tơdrong tơgoăt tơgoăl joăt joe đơ̆ng sơ̆ hăm Croatia păng hôn bơnê kơtang dôm hơyak atŏk tơ iung lơ̆m jang hơdoi dih băl khei năr ou ki. ‘Moi kiơ̆ tơdrong đei jang hơdoi oei pơih să, Thủ tướng athei ƀar păh pơtrŭt kơtang hloh dơ̆ng jang hơdoi mŭk drăm, mơdro sa păng tơmơ̆t jên jang; hơdrin hrôih pơm hơtok tĕch mơdro dih băl iŏk đei lơ hlŏh ƀar ‘măng pơtêng hăm trong tơlĕch ăn 161 triu USD nhen hrei ou. Thủ tướng jei athei chă tơchĕng hơlen pơjing Hơnih jang hơdoi găh tơdrong jang hơdoi mŭk drăm vă pơjing hơyak pran pơtrŭt kơtang jang hơdoi sơđơ̆ng, đunh đai păng iŏk đei jơnei. Việt Nam pơtrŭt kơtang hơnih mơdro sa Croatia atŏk kơtang tơmơ̆t jên jang lơ̆m rim tơdrong đei nhen dơnŏk đak dơsĭ, logistics, ŭnh hơyuh, tơmang pơhiơ̆, khoa hŏk-kmăi kmŏk, tơplih kơsô̆ păng iung tơjră tang găn hăm tơplih tŏ ‘mi kial. Kơdră jang tơbôl Gordan Grlić Radman sơkơ̆t hơdăh Croatia ling lang lăng kăl tơdrong tơgoăt tơgoăl hăm Việt Nam păng tơlĕch jang kơtang iung jang hơdoi tơlĕch jang jơnei rim trong pơkăp jang hơdoi dih băl, atŏk kơtang tơgoăt dih băl hơnih mơdro sa păng pơih să jang hơdoi lơ̆m lơ tơdrong mă ƀar păh lăng truh.