Kiơ̆ kơ Thủ tướng Lê Minh Hưng, hnam oei ăn thuê athei đei băt hơdăh ‘noh jĭ tơdrong jang gĭt kăl, đunh đai, pơyua ăn lơ lap kon pơlei, mă loi ‘noh jĭ kŏng nhơ̆n, bơngai jang, sinh viên, kang ƀô̆, bơngai jang kơ teh đak păng khŭl lĭnh ƀô̆ đô̆i đei ‘meh vă tôch kơ lơ găh thuê hnam hăm kơjă trŏ lăp. Thủ tướng athei Hà Nội tơgŭm hơdrol pơm pơlong hơdrol, athei iung jang hơdrol, tơtĕnh dăr hơlen pơđĭ tơproh jang, jên, hnam mŭk tơmam teh đak tŏk bŏk iŏk yua ưh kơ jơnei vă đei trong proh hơmet, hơtŏk tơiung tơdrong jang hnam oei ăn thuê; roi tơbăt kơ Thủ tướng teh đak pơtôch lơ̆m khei 6 sơnăm 2026.

Thủ tướng tơroi rơđăh, dôm trong jang pơlong kơ Hà Nội tơdăh bơ̆jang kiơ̆ đei yua gô pơih să lơ̆m teh đak. Pơma tơ̆ lêh tơlĕch jang, Kơdră Anih vei lăng kon pơlei pơlei tơm Hà Nội Vũ Đại Thắng pơma hơdăh ‘nâu jĭ yak năm hơdăh vă hơnhăk tơdrong tơchơ̆t đơ̆ng Anih tơm Chĭnh trĭ găh pơjing păng hơtŏk tơiung anih kơdrơ̆m Hà Nội lơ̆m chăl ‘nao, Luơ̆t Anih kơdrơ̆m, proh hơmet akŏm Anih tơm păng dôm trong jang, tơdrong tơgŭm hơdrô̆ đơ̆ng Trung ương yak mơ̆t lơ̆m yan âu; tơƀôh tơdrong hơdrin jang đơ̆ng Hà Nội lơ̆m tơdrong iŏk yua jơnei dôm trong jang hlôi đei pơjao vă pơm đei tơdrong ‘lơ̆ng jang tŏk ‘nao, hơnih hơtŏk tơiung ‘nao păng dôm kơjă kăp gĭt ‘nao ăn kon pơlei Anih tơm.