Pơgê brei (21/09) tơ̆ Anih bơ̆jang kơ Khŭl kơdră teh đak,Thủ tướng Lê Minh Hưng pơgơ̆r jơ bơ̆jang hăm Anih tơm vei lăng găh pơtho pơhrăm kŭm hăm dôm anih tơm, anih jang đei ƀơm truh, vă akŏm hơmet pơ ‘lơ̆ng hăt hot tơdrong ưh kơ măh hla ar hŏk ăn sơnăm hŏk 2026-2027; dăr hơlen tơdrong jang, hla ar hŏk phô thŏng păng hơmet ăn Khŭl dăr hơlen  tơdrong jang kiơ̆ Tơdrong tơchơ̆t kơsô̆ 71 ‘năr 22/8/2025 đơ̆ng Anih tơm Chĭnh trĭ găh tơdrong pran hơtŏk tơiung pơtho pơhrăm. Thủ tướng Lê Minh Hưng pơma hơdăh, sơnăm hŏk 2026-2027 jĭ sơnăm hŏk mă blŭng lơ̆m teh đak tơlĕch jang hla ar hŏk lei lăi băl jơ̆p lơ̆m teh đak. Mă đơ̆ng Kơdră chĕp kơ̆l Đảng, Teh đak păng Khŭl kơdră teh đak hlôi pơgơ̆r jang đơ̆ng hrôih, mă lei mă đơ̆ng đĭ yak mơ̆t lơ̆m sơnăm hŏk ‘nao vă jê̆ 1 khei, tơ̆ 1,2 tơring oei đei ƀôh tơdrong hŏk tro ưh kơ măh hla ar hŏk.

Kiơ̆ roi tơbăt, kơsô̆ hla ar hŏk oei ưh kơ măh dang 776.000 blăh (đei dang 0,31%), Thủ tướng pơma hơdăh, ‘nâu jĭ tơdrong kăl đei tơpôl bơngơ̆t truh dêh hloh, athei Anih tơm vei lăng găh pơtho pơhrăm jang hơdai kơjăp hăm dôm tơring, Anih vei lăng pơtho pơhrăm dăr hơlen mă hơdăh rim hla ar, môn hŏk oei ưh kơmăh vă đei trong jang hơmet pơ ‘lơ̆ng pơtôch, vă vei sơđơ̆ng tơdrong pơtruh tôm hla ar hŏk lơ̆m khei ‘năr hrĕnh hloh.