VOV4.Bahnar - Kŭm lơ̆m pơ gê ‘năr 28/4 Thủ tướng Phạm Minh Chính năm tơ mang, pơ lung păng asong tơ mam ăn kơ đe hŏk tro đei tơ drong arih sa mơ mat tat kơ hnam trưng hŏk jăl 3 teh đak rong ‘me hŏk tro kon kông Huỳnh Cương, dêh char Sóc Trăng. Pơ ma dơ nuh hăm kơ dră chĕp kơ̆l dêh char Sóc Trăng păng kơ dră vei lăng hnam trưng, Thủ tướng pơ ư kơ jơ hngơ̆m đon hŏk pơ hrăm, pơ tho đơ̆ng đe thây kô, đe oh hŏk tro, hlôi tôch kơ hơ drin yak hloh mơ mat tat, hơ drin rim năr vă pơ tho ‘lơ̆ng păng hŏk ‘lơ̆ng.

Tơ roi dơ̆ng nơ̆r pơ ma đơ̆ng ƀok Hồ “ Yua kơ đei yua 10 sơ năm pơ tăm ‘long, yua kơ đei yua kơ hrĕng sơ năm pơ tho bơ ngai”, Thủ tướng ‘meh vă đe thây kô pơ tho păng hŏk tro hnam trưng Huỳnh Cương gô hơ tŏk tơ drong joăt joe, hơ tŏk tơ iung tôm tơ drong, iŏk đei lơ jơ nei ‘lơ̆ng hloh dơ̆ng lơ̆m pơ tho păng hŏk. Thủ tướng ‘meh vă păng lui ngeh, hăm tơ drong bơ ngơ̆t truh đơ̆ng kơ dră chĕp kơ̆l rim tơ ring, tơ drong lui ngeh păng hơ mĕng đơ̆ng mĕ ƀă, jơ hngơ̆m đon đơ̆ng đe thây kô pơ tho, hơ pơi ‘meh đơ̆ng sơ năm mơ lôh, đe oh hŏk tro hơ drin hŏk pơ hrăm ‘lơ̆ng vă tơ plih tơ drong arih sa đơ̆ng kơ dih tơ gop pơ jing pơ lei pơ la teh đak roi ‘năr roi pơ drŏng ‘lơ̆ng.

Thuem: Tơ blơ̆