Lơ̆m ‘măng năm tơmang au, Thủ tướng New Zealand Jacinda Ardern gô vang năm Pơm lêh sơng, pơma đam hăm Thủ tướng Tĕh đak Phạm Minh Chính; tơƀơ̆p pơma dơnŭh hăm khŭl chih kơtơng ang; năm kŭh ka hla bat ăn Tổng Bí thư Nguyễn Phú Trọng; pơma dơnŭh hăm Kơdră chĕp pơgơ̆r tĕh đak Nguyễn Xuân Phúc păng Kơdră chĕp pơgơ̆r Kuôk hô̆i Vương Đình Huệ; vang năm ‘Măng pơma dơnŭh hơnĭh mơdro sa Việt Nam – New Zealand; vang năm ‘măng pơgơ̆r Tơgoăt Chŏh jang sa New Zealand atŭm hăm mĭnh ƀar tơdrong pơgơ̆r anai.

‘Măng năm tơmang tơ̆ Việt Nam đơ̆ng Thủ tướng New Zealand Jacinda Ardern gô tơgop hơmet pơ ‘lơng chĭnh trĭ, pơtrŭt kơtang jang hơdoi lơ tơdrong ƀar păh tĕh đak nhen chĭnh trĭ-tơpôl, vei lăng tĕh đak-sơđơ̆ng tơring, jang mŭk drăm, tơmơ̆t jên jang, bơngai jang, pơtho pơhrăm, kmăi kmŏk, tơplĭh tŏ ‘mi kial, jang kiơ̆ kmăi kmŏk kơsô̆.