Anih chĕp kơ̆l pơ gơ̆r Kuô̆k hô̆i đei nơ̆r roi tơ băt tôch rơ đăh găh tơ drong apinh jet păng tơl nơ̆r apinh jet lơ̆m ‘măng hop akŏm âu. Kiơ̆ kơ ‘nŏh, dôm tơ drong đei Kuô̆k hô̆i rơih vă apinh jet ‘nŏh ming man, jang nô̆i vŭ, tơ roi tơ băt, dăr hơ len. Grŭp dôm tơ drong mă mônh găh tơ drong jang ming man, ƀok Kơ dră vei lăng tơ drong jang ming man Nguyễn Thanh Nghị tơl tơ blang ƀơm truh rim tơ drong dang ei, trong pơm hơ tŏk tơ drong ‘lơ̆ng mưh tơ proh trong jang păng vei lăng atŏk tơ iung tơ ring kơ drâm đơ̆ng Việt Nam, mă loi ‘nŏh dôm plt tih. Grŭp dôm tơ drong mă 2 găh tơ drong tơ roi tơ băt, ƀok Kơ dră vei lăng tơ drong tơ roi tơ băt Nguyễn Mạnh Hùng vă tơl tơ blang dôm tơ drong ƀơm truh trong iŏk yoa kơ măy roi tơ băt vă vei lăng tĕh đak, pơ jing Khul kơ dră tĕh đak kơ sô̆, khul kơ dră pơ gơ̆r hăm kơ măy sô̆.

Thủ tướng tĕh đak, ƀok Phạm Minh Chính

Grŭp tơ drong mă 3 găh tơ drong jang nô̆i vŭ, Yă Kơ dră vei lăng tơ drong jang nô̆i vŭ Phạm Thị Thanh Trà vă tơl tơ blang găh tơ drong hơ met ming khul bơ ngai jang, tơ jur ƀiên chê̆, hơ met bơ ngai kiơ̆ hơ năp jang hơ dai hăm hơ met ming khul kăn ƀô̆, bơ ngai jang kơ tĕh đak păng tơ drong tơ lĕch jang kiơ̆ trong tơ gŭm jên khei hăm kăn ƀô̆, bơ ngai jang kơ tĕh đak. Grŭp tơ drong mă 4 găh tơ drong jang dăr hơ len, Kơ dră chĕp kơ̆l Anih dăr hơ len kơ tĕh đak Đoàn Hồng Phong iung tơl tơ blang găh hơ tŏk tơ drong đei yoa đơ̆ng tơ drong jang dăr lăng, tơ tom tang găn đei dôm tơ drong pơm glăi luơ̆t. Hơ tuch jơ apinh jet, Thủ tướng Phạm Minh Chính vă pơm hơ dăh dôm tơ drong đei ƀơm truh păng tơl tơ blang dôm nơ̆r apinh đơ̆ng bơ ngai tang măt Kuô̆k hô̆i.