Thủ tướng hlôi tơroi hăm kon pơlei tah hla gah tơdrong sơkơ̆t đơ̆ng hop akŏm mă 8 păng tơdrong jang mŭk drăm tơpôl kơ teh đak khei năr âu ki, tơdrong tơplih 'nao, sơkơ̆t jơnŭm pơgơ̆r jang kơ anih jang chĭnh trĭ, tơjur ƀiên chê̆ tơguăt hăm hơmet pơ-'lơ̆ng, iŏk yua tơnăp khul kang ƀô̆, bơngai jang; tơjur jên huach păng tơplih tơchơ̆t gah kla jên khei. Atŭm hăm noh, Thủ tướng adoi tơblang dôm tơdrong mă kon pơlei tah hla apinh gah dôm tơdrong đei tơrĕk truh man trong nơnăm, mă kăl noh jăl trong kơdâu renh Tu – Pơbah, jăl trong gre treng kơdâu renh Tu – Pơbah, dôm trong pơkăp tơgŭm hăm bơngai vang jang ăn kăch mang; tơdrong tơjră đak lơ̆p, vei sơđơ̆ng đak ưh đei hơbông tơ̆ tơring tơmăn đak krong Cửu Long.

Thủ tướng sơkơ̆t hơdah dang ei, jơnŭm pơgơ̆r teh đak păng dôm tơring tŏk bŏk oei chă trong pơkăp tôm 1 triu hectar teh vă pơtăm 1 triu hectar ƀa, pơjing hơnăn phe Việt Nam mă đe ư ang lơ̆m apŭng plenh teh, pơih să tơring tĕch răt, tơgŭm gah khua hŏk kŏng ngê̆, iŏk yua trong jang tơplih kơsô̆.